Болашақ көшбасшылар елордада бас қосты

Желтоқсанның 9-13 аралығында Астанада өткен «ҚТЖ» ҰК» АҚ теміржолшы жастарының ХІІІ республикалық жастар форумы 250-ге жуық өскелең ұрпақ өкілінің басын қосқан мазмұнды да маңызды шара болды. Форумға «ҚТЖ-100 жас есім» жобасының жеңімпаздары, «Жас үздік маман» республикалық кәсіби конкурсының финалистері, «ҚТЖ лигасы» КВН финалдық ойындарының, «Корпоративтік волонтер» конкурсының қатысушылары, жастар ісі жөніндегі кеңестің өңірлік өкілдері және «Самұрық Қазына» АҚ компаниялар тобына кіретін портфельдік компаниялардың шақырылған қонақтары, сондай-ақ М.Тынышпаев атындағы ALT университетінің студенттері қатысты.

Форум барысында компанияның жас қызметкерлеріне коммуникациялық алаңдар, компания басшыларымен және негізгі менеджерлерімен панельдік сессиялар, жеке және іскерлік құзыреттілікті дамыту бойынша оқыту тренингтері, зияткерлік ойын және тағы басқалар ұйымдастырылды.  

Форумның нәтижелері бойынша компанияның Басқарма төрағасы жанындағы жастар ісі жөніндегі кеңестің өңірлік өкілдері болып Ақмола аймағы бойынша – Ақмола ЖТ бөлімшесінің персонал жөніндегі менеджері Нұргүл Айтен, Павлодар аймағы бойынша – Павлодар ЖТ бөлімшесінің қозғалыс қауіпсіздігі қызметінің бас маманы Дина Қоныспаева екі жыл мерзімге тағайындалды. Жастар ісі жөніндегі кеңестің ең белсенді өңірлік өкілі деп Кәмшат Серік танылды. Ол Қарағанды магистральдық желі бөлімшесінің жөндеу-құрылыс бригадасы сылақшысы, оған «ҚТЖ» ҰК» АҚ мен оның еңбек ұжымы арасындағы ұжымдық шартқа сәйкес 30 (отыз) АЕК мөлшерінде біржолғы материалдық көмек беру қарастырылған.  

«Корпоративтік волонтер» байқауы бойынша «Үлкендерге қамқорлық», «Балаларға қамқорлық», «Табиғатқа қамқорлық», «Қоғам мен ортаны дамыту», «Спорт және денсаулық» аталымдары бойынша жеңімпаздар мен жүлдегерлер анықталып, марапатталды. Форум аясында теміржолдың талантты жастары әзірлеген 37 жобаның арасынан 18 жоба іріктеліп, жиынға қатысушылар мен сырттан келген қонақтарға, компания топ-менеджерлері назарына ұсынылды.  

Форум жұмысының қорытындысы бойынша осы жобалар ішінен «Теміржол вокзалдарының дизайн-коды» жобасы үздік деп танылып, бірінші орынға ие болды. «СО, СИЗ бақылауды есепке алуды жоспарлау рәсімін жақсарту» жобасы екінші орынға, ал «Чат-бот HR-көмек» жобасы үшінші орынға лайық деп танылды.