Шэньси провинциясы транзиттік тасымалды дамытуға 2,5 млрд юань инвестиция салады
2025 жылғы 22 ақпанда Шэньси провинциясының губернаторы Чжао Ган «ҚТЖ» ҰК» АҚ Басқарма төрағасы Нұрлан Сауранбаевты қабылдады, деп хабарлайды Rail-news.kz.
Кездесу барысында тараптар бірлескен логистикалық жобалардың сәтті іске асырылып жатқанын атап өтіп, болашақтағы ынтымақтастық мүмкіндіктерін талқылады.
Биыл Алматы қаласындағы жаңа логистикалық кешен (ГТС-2), Мәскеу облысындағы Селятино станциясында орналасатын CRK Terminal логистикалық орталығы және Әзербайжандағы Алят портының терминалы сияқты үш ірі жоба іске қосылады.
Сондай-ақ, жүк тасымалы көлемін ұлғайту және халықаралық көлік дәліздерін дамыту мәселелері талқыланды. 2025 жылы Шэньси провинциясы Қытай – Еуропа бағытындағы контейнерлік пойыздардың дамуына 2,5 млрд юань инвестиция бөледі. Сонымен қатар, Қазақстан аумағы арқылы транзитпен 3000 контейнерлік пойыздың жөнелтілуі жоспарланған.
Кездесу барысында 2025 жылдың маңызды оқиғалары да талқыланды. Қытайдың Қазақстандағы Туризм жылын қолдау аясында Сиань – Алматы бағыты бойынша алғашқы жолаушылар туристік пойызы іске қосылады. Бұдан бөлек, Қытай – Еуропа бағыты бойынша Транскаспий халықаралық көлік дәлізі (ТМТМ) арқылы мерейтойлық контейнерлік пойызды жөнелту рәсіміне дайындық және Сиань қаласында өтетін халықаралық көлік-логистика форумдарына Қазақстан тарапынан қатысу мәселелері қаралды.
Тараптар көлік-логистика саласындағы ынтымақтастықты одан әрі нығайтуға және жаңа бірлескен жобаларды жүзеге асыруға дайын екендерін білдірді.