Кәсіподақ қызметіне баға берді

Жуырда Семей ЖТ бөлімшесінде кәсіподақ комитетінің есепті-сайлау конференциясы өтті. Шараға «ҚТЖ-ЖТ» ЖШС филиалы кәсіподағының төрағасы Ермек Төлегенов арнайы келіп қатысты.

Конференция барысында НОД-ЖТ кәсіподақ ұйымының төрайымы Айгүл Берікболова баяндама жасап, өткен жылғы атқарылған іс-шараларға кеңінен тоқталды. Әлеуметтік сала, спорт, қайырымдылық, ұжымдық шарт аясындағы жұмыстар жайын сөз еткен Айгүл Мырзағалиқызы алдағы жоспарлармен де бөлісті.  

– Бүгінде бөлімшенің Семей өңірі бойынша 2088 адам – кәсіподақ мүшесі. Өткен жылы жаңадан 78 адам кәсіподақ мүшелігіне қабылданды. Жалпы, өткен жылы жергілікті кәсіподақ тарапынан атқарылған іс аз емес. Балалар екі рет Астанаға ұшақпен барып қайтты. Лагерь жұмысы оңынан жолға қойылған. Ардагерлер де назардан тыс қалған жоқ, – деп атап өткен Айгүл Мырзағалиқызы әсіресе спорт саласы бойынша жұмыстар қарқынды екенін жеткізді. Түрлі спорттық сайыстар тұрақты түрде өткізіліп, жергілікті спортшылар республикалық сайыстарға қатысып, жүлделі орындар иемденгені белгілі болды.  

Сонымен қатар бөлімше теміржолшыларының бұқаралық спорт түрлерімен тұрақты айналысуы үшін өткен жылдың соңында 896 мың теңгеге түрлі спорттық құрал-жабдықтар алыныпты. Қазіргі күні спортзал қайта жаңартылуда. Өткен жылы түрлі себептер бойынша өтініш білдірген кәсіподақтың 81 мүшесіне қайырымдылық көмек жасалған. Оның сыртында қымбат бағалы операциялар мен дәрі-дәрмектер алу үшін және емделуге 1 514 500 теңге қаржы берілген.  

Жиын барысында сөз алған Ермек Нақыпбекұлы теміржолшылар игілігі жолындағы кәсіподақ қызметі жайында кеңінен сөз етті. «Қазкөліккәсіп» ҚБ Семей өңірі бойынша өкілі Есен Қажығұлов та пікірін білдірді.  

Есептік жиынға қатысушылар кәсіподақ жетекшісінің жұмысын оң бағалап, сайлау нәтижесі бойынша бөлімше кәсіподақ комитетінің төрайымы болып Айгүл Мырзағалиқызы қайтадан сайланды.