Ақтауда Каспий теңізі акваториясындағы ең ірі контейнерлік хаб жұмыс істей бастады
Мемлекет басшысының 2023 жылғы қыркүйектегі тапсырмасы бойынша салынған контейнерлік хаб мерзімінен бұрын пайдалануға берілді, деп хабарлайды Rail-news.kz.
Жобаны "Қазақстан темір жолы" ҰК" АҚ ("KTZ Express" АҚ еншілес компаниясы атынан) Ляньюньган портымен (Қытайдың ірі порттарының бірі) және "Ақтау халықаралық теңіз сауда порты" ҰК" АҚ бірлесіп іске асырды.
Контейнерлік хабтың ашылу рәсімі Маңғыстау облысы әкімінің, "Самұрық-Қазына" АҚ, "ҚТЖ" ҰК" АҚ басшыларының, халықаралық серіктестер мен логистикалық компаниялар басшыларының қатысуымен өтті. Еңбегі мен үлесі бастаманы сәтті жүзеге асыруға ықпал еткен жоба қатысушылары марапаттарға ие болды.
"Жобаға қатысқандардың барлығына алғысымды білдіремін. Транзиттік-көліктік әлеуетті дамыту - елдің стратегиялық мақсаттарының бірі. Бұл бағытта "Самұрық-Қазына" АҚ мен ҚТЖ бірлесіп Қазақстанда ғана емес, шетелде де белсенді жұмыс істейді. ҚТЖ-ның Ляньюньган портымен серіктестігінің 10 жылында Ляньюньганда қазақстандық-қытайлық терминал, Khorgos Gateway Құрғақ порты, ал қазір Ақтауда контейнерлік хаб ашылды. Бұл жоба Қазақстанда көлік пен логистиканы дамытудағы маңызды қадам", - деп атап өтті "Самұрық-Қазына" АҚ Басқарма Төрағасы Нұрлан Жақыпов.
Жаңа хаб транзиттік мүмкіндіктердің өсуін қамтамасыз етеді және Қазақстанның Шығыс - Батыс, сондай - ақ Солтүстік - Оңтүстік және басқа да халықаралық маршруттардағы маңызды буын ретіндегі позициясын нығайтады. Қазақстанда баламасы жоқ озық технологияларды қамтитын заманауи логистикалық инфрақұрылым контейнерлік жүктерді өңдеуді едәуір жеделдетеді.
Нысан жұмысының басталуы Қытайдан ТХКБ маршруты бойынша 100 мыңыншы контейнердің келуімен атап өтілді.
Анықтама: Жобаның бас мердігері China Communications Construction Company (CCCC) консорциумы болды. Бұл көлік инфрақұрылымы нысандарын салуға маманданған және порт құрылысы саласындағы ірі жобаларды жүзеге асыруда мол тәжірибесі бар Қытайдың ірі мемлекеттік корпорацияларының бірі. Оның техникалық сараптамасы мен құрылысты басқарудың кешенді тәсілінің арқасында объект қысқа мерзімде іске асырылды.