ҚТЖ басшылығы Бейжіңде өткен ХТЖО-ның XII конгресінде бірқатар стратегиялық кездесулер өткізді
Қытай астанасында өтіп жатқан Халықаралық темір жолдар одағының (ХТЖО) XII конгресінің бірінші күні "Қазақстан темір жолы" ҰК" АҚ Басқарма төрағасы Талғат Алдыбергенов негізгі халықаралық әріптестермен бірқатар екіжақты кездесулер өткізді, деп хабарлайды Rail-news.kz.
Теміржол машина жасау саласындағы әлемдік көшбасшы — CRRC қытай компаниясы басшылығымен келіссөздер болып өтті. Жылжымалы құрамды жеткізу саласындағы ынтымақтастықты кеңейту, инновациялық шешімдерді енгізу және өндірісті локализациялау перспективалары талқыланды.
Әзірбайжан темір жолдары басшылығымен кездесу барысында Транскаспий халықаралық көлік бағдары бойынша жүк тасымалдау көлемін ұлғайту мәселелері қаралды. Логистикалық процестерді жеделдету мен оңайлатуды, сондай-ақ Қазақстан мен Әзірбайжан темір жолдарының ақпараттық жүйелерін интеграциялауды қамтамасыз ету үшін маршрутты цифрландыру мен автоматтандыруға баса назар аударылды.
Сондай-ақ, ҚТЖ делегациясы конгресс аясында ұйымдастырылған теміржол саласындағы жаңа технологиялық шешімдер мен инновациялар, соның ішінде цифрлық платформалар, қозғалысты басқарудың заманауи жүйелері мен жылжымалы құрамның озық үлгілері ұсынылған көрмеге қатысты.