Құрметті теміржолшы «Құрмет» орденімен марапатталды

Астанада Еңбек күніне арналған «Еңбек адамы – ел мақтанышы» республикалық форумында ҚР Премьер-министрі  Олжас Бектенов еңбек адамдарына мемлекеттік наградаларды табыс етті, дғп хабарлайды Rail-news.kz.

Жоғары марапат – «Құрмет» ордені теміржол саласының ардагері Бахтарбек Құрманғожанұлы Жүнісовке берілді.

Ол еңбек жолын жол шебері қызметінен бастап, «ҚТЖ» ҰК» АҚ «Магистральдық желі дирекциясы» – Жол және құрылыстар департаменті директорының орынбасарына дейінгі лауазымдарда атқарды. Өмірінің жарты ғасырдан астам уақытын Қазақстан темір жолының инфрақұрылымын дамытуға, негізгі желілер мен зауыттарды салу мен қайта жаңғыртуға, сондай-ақ рельстерді дәнекерлеуден бастап жаңа бекітпе түрлері мен бұрма тораптарын төсеуге дейінгі жүздеген техникалық жаңалықтарды енгізуге арнады.

Жүнісов елімізде «Talgo» пойызының жылдам жүрдек қозғалысын енгізудің бастауында тұрды, жол шаруашылығын жаңғыртуға және инженерлік кадрларды даярлауға айтарлықтай үлес қосты. Оның көптеген шәкірттері бүгінде Қазақстан теміржолында ғана емес, одан тыс жерлерде де басшылық қызмет атқарып жүр.

Елеулі еңбегі үшін ол:

• «Құрметті теміржолшы» атағымен,

• «Еңбек Ардагері» медалімен,

• «ҚТЖ-ға 100 жыл» медалімен марапатталған.