ҚТЖ-дағы сөйлеу клубы Қадыр Мырза Әліні еске алды
«Қазақстан теміржолшысы» газетінің тілшісі
«ҚТЖ» ҰК» АҚ қызметкерлерінің қатысуымен ай сайын дәстүрлі түрде ұйымдастырылатын қазақ тілінде сөйлеу клубының кезекті отырысы ақын, аудармашы, драматург, Қазақстанның халық жазушысы Қадыр Мырза Әлінің туған күніне орай «Қадыр Мырза Әлінің қанатты сөздері» тақырыбында өтті.
Іс-шара барысында қатысушылар ұлт руханиятының алып тұлғасы Қадыр Мырза Әлінің өмір жолы мен бай шығармашылық мұрасын еске алып, ақынның елдік рухты, адамгершілік пен парасатты дәріптейтін қанатты сөздері мен өлеңдеріне терең талдау жасады. Қаламгердің мағыналы нақылдары оқылып, әрбір ойдың тәрбиелік мәні мен бүгінгі қоғамдағы өзектілігі жан-жақты талқыланды.
Кездесу барысында Қадыр Мырза Әлінің өлеңдерінен үзінділер оқылып, оның сөз өнеріндегі дара қолтаңбасы, ұлттық болмысты асқақтатқан ой-тұжырымдары туралы мазмұнды пікірлер айтылды. Қатысушылар ақын шығармашылығын жүрекпен қабылдап, қазақ тілінде еркін әрі әсерлі ой өрбітті.
Іс-шара аясында қатысушылардың белсенділігін арттыру мақсатында Wordwall платформасы арқылы «ұяшық ашу» форматындағы интерактивті ойын ұйымдастырылды. Ойын барысында Қадыр Мырза Әлінің қанатты сөздері мен шығармашылығына қатысты тапсырмалар орындалып, қызметкерлер өз білімдерін ортаға салды.
Сонымен қатар, қазақ тілінде сөйлеу дағдыларын дамытуға бағытталған түрлі танымдық, зияткерлік және шығармашылық ойындар өткізіліп, қатысушылар жоғары белсенділік пен қызығушылық танытты.
Аталған сөйлеу клубы Қадыр Мырза Әлінің өшпес рухани мұрасын дәріптей отырып, ұжым мүшелерінің ұлттық сана-сезімін нығайтуға, мемлекеттік тілдің қолданыс аясын кеңейтуге, сондай-ақ бірлік пен ұйымшылдықты арттыруға елеулі үлес қосты.