Мұқағали мұрасы – ұлт қазынасы

«ҚТЖ» ҰК» АҚ Көпфункционалды қызмет көрсету орталығы Мемлекеттік тілді дамыту секторының Қазақ тілінде сөйлесу клубының кезекті отырысы өтті. Айына бір рет ұйымдастырылатын іс-шара бұл жолы «Қазақтың мұзбалақ ақыны – Мұқағали» тақырыбын арқау етті.

Ақиық ақынның 95 жылдығына арналған клуб отырысына Орталық аппараттың 30-ға жуық қызметкерлері қатысып, ақынның өмірі мен шығармашылығына қатысты өз білгенімен бөлісті.

– Бүгін біз қазақ поэзиясының асқар шыңы, бәйтерегі, қазақ әдебиетінің шоқ жұлдызы Мұқағали Мақатаевтың мерейтойы қарсаңында осы отырысты өткізіп отырмыз. Клуб қатысушыларына тақырыпты алдын ала жібергенбіз. Мұқағалидың өлеңін білмейтін, оның сөздеріне жазылған әндерін айтпайтын қазақ кемде-кем. Сондықтан бүгінгі кешке барынша атсалысасыздар деген сенімдемін, – деді отырысты ашқан сектор басшысы Ербол Тоқтағазы.  

Расында отырысқа қатысушылар ақын өлеңдерін бірінен соң бірі жатқа оқып, әндерін домбырамен орындауы олардың поэзияға, жалпы сөз өнеріне жақындығын байқатты. Кешті жүргізуші, аталған сектордың бас менеджері Меруерт Ақбердиева жиынды бірнеше бөлімдерге бөліп, қызықты өткізуге тырысты. Атап айтқанда, «Ғасыр ақыны», «Есіңе мені алғайсың», «Махаббат», «Күнделік», «Өлең және ән» деген сияқты ұяшықтарды ашып, сондағы тапсырмаларды оқыды. Қызметкерлер «Неліктен ақын өлеңдері уақыт өтсе де ескірмейді?», «Оның қоғам үшін құндылығы қандай?», «Адам артына қандай із қалдыруы керек?», «Күнделік жүргізген дұрыс па?» деген және басқа да сұрақтар төңірегінде ойларын ортаға салды. Соңында «Kahoot бейне» ойыны арқылы ақынның өмірі мен шығармашылығына арналған викториналық ойын өтіп, көпшілік оған үлкен белсенділікпен қатысты.