Үкімет басшысы транзиттік тасымал көлемін 60%-ға ұлғайту көзделіп отырғанын айтты
Қазақстан Республикасының Президенті Қасым-Жомарт Тоқаевтың төрағалығымен өткен Үкіметтің кеңейтілген отырысында Премьер-министр Олжас Бектенов көлік-логистика инфрақұрылымын дамыту және елдің транзиттік әлеуетін арттыру бойынша қабылданып жатқан шаралар туралы баяндады, деп хабарлайды Rail-news.kz.
Олжас Бектеновтың айтуынша, биыл жалпы ұзындығы 475 шақырым болатын екі теміржол желісінің құрылысы және 2,9 мың шақырым жолды жаңғырту жұмыстары аяқталады.
«Бұл транзиттік тасымал көлемін 60%-ға ұлғайтуға, ал транзиттік контейнерлік пойыздардың жылдамдығын сағатына 50 шақырымға дейін арттыруға мүмкіндік береді. Атап айтқанда, Қытай шекарасынан Каспийге дейін жүктерді жеткізу уақыты осы жылдың соңына қарай 84 сағаттан 55 сағатқа дейін қысқарады. 11 мың шақырым автомобиль жолдарын салу мен реконструкциялау жұмыстары жүзеге асырылатын болады», — деп атап өтті Олжас Бектенов.
Үкімет басшысы сондай-ақ транзиттік әлеуеттің серпінді дамуын тежейтін бірқатар факторлар белгіленгенін жеткізді. Солардың бірі теміржол инфрақұрылымдарының тозуының жоғары деңгейі болып қалып отыр. Осыған байланысты магистральдық теміржол желісін жаңғырту жөніндегі кешенді бағдарламаны жүзеге асыру Үкіметтің тұрақты бақылауында.