Ғасырдың дара тұлғасы
«Қазақстан теміржолшысы» газетінің тілшісі
«ҚТЖ» ҰК» АҚ «Көпфункционалды қызмет көрсету орталығы» филиалының Мемлекеттік тілді дамыту секторының Қазақ тілінде сөйлесу клубы кезекті отырысын «Ғасырдың дара тұлғасы – Қаныш Сәтбаев» тақырыбына арнады.
Сектор басшысы Ербол Тоқтағазы компанияда мемлекеттік тіл саясатын жүзеге асырудағы жоспарлы жұмыстардың бірі ретінде осы тұрақты клубтың қызметін жандандыруға атсалысып жүргендерге алғыс білдірді.
– Айына бір рет өтетін клуб отырысынан қалмай қатысу арқылы да сіздер бұл маңызды іске үлкен үлес қосып жүрсіз. Аты айтып тұрғандай, қазақша сөйлесу клубының мақсаты – тілдік кедергілерді жою, тілдік дағдыларды қалыптастыру. Дегенмен бұдан да маңызды жұмысымыз қазақтың тарихын, мәдениетін насихаттауға көңіл бөлеміз. Бүгінгі отырысты белгілі ғалым Қаныш Сәтбаевқа арнадық. Қаныш Сәтбаев – тек ғалым ғана емес, ұлтын сүйген нағыз патриот, жан-жақты тұлға. Клубтың келесі тақырыптары да осындай қазақтың маңдайына біткен бірегей тұлғалары туралы болады, бұл біздің рухымызды биіктетіп, патриоттық сезімді нығайтуға септік етері сөзсіз, – деді ол.
Жиын академик-ғалымның өмірі мен еңбектері туралы бей неролик көрсетумен басталды. Одан әрі қатысушылар топтарға бөлініп, «Кім жылдам?» ойынына кезек берілді. Сектордың бас менеджері Меруерт Ақбердиева ойын шартын түсіндірді. Бір адам ғалымға қатысты бір сөзді бастап, сол сөздің соңғы әрпінен басталатын сөзді келесі адам сол мазмұнда әрі жалғастырып әкетуі керек. Келесі тапсырма «Тілмәш» деп аталды, қатысушыларға ғалымның өмірі жайлы орысша жазылған мәтіні бар карточка таратылып, ойыншылар соны қазақ тіліне аударып, оқып берді.
«Қасиеттер галереясы» деп аталған келесі тапсырмада экранға ғалымның тұлғалық бейнесін құрайтын негізгі қасиеттер жазылды, мысалы патриотизм, ал қатысушылар сол қасиеттің күнделікті жұмыс барысында немесе өмірде көрініс табуынан мысал келтірді. Қорытынды бөлім Wordwall Quiz деп аталып, экранда ғалым туралы сұрақтар қойылып, оның 4 жауабы берілді. Қатысушылар соның ішіндегі дұрыс жауапты тапты. Клуб мүшелері кезекті отырысты әдеттегідей қазақша ән айтумен аяқтады.