ALT Astana колледжінде логистиканың заманауи трендтері талқыланды
«Қазақстан теміржолшысы» газетінің тілшісі
Жақында М.Тынышпаев атындағы ALT Astana колледжі студенттерінің «Кедентранссервис» АҚ өкілімен кездесуі өтіп, ол жай ғана дәріс емес, мамандыққа практикалық тұрғыда терең үңілу форматында өтті.
Спикер ретінде осы оқу орнының түлегі, қазір «Кедентранссервис» АҚ Логистика департаментінің бас менеджері Амина Махамбетова арнайы шақырылды. Оның кәсіби жолы – білім мен ізденістің алар асуы биік екенінің айқын көрінісі.
Кездесу барысында спикер теміржол логистикасындағы заманауи трендтер, тарифтік саясаттың рөлі және салада мансап құруға қажетті негізгі дағдылар туралы әңгіме өрбітті. Студенттерге жоғары жауапкершілік пен қарқынды жағдайда шешімдердің қалай қабылданатынын көруге мүмкіндік беретін нақты кейстер ерекше қызығушылық тудырды.
«Логистика – бұл ойлау жүйесі. Бір ғана бағыттан кеңірек үдерістерді көре алсаңыз, онда сіз бір қадам алда болғаныңыз», – деп атап өтті Амина Махамбетова.
Кездесу ашық диалог форматында өтіп, студенттердің кәсіби таңдауын анықтауына жасалған маңызды қадам болды.