Белсенді әйелдер бас қосты
«Қазақстан теміржолшысы» газетінің тілшісі
Астанада алғаш рет Кәсіподақтың әйелдер комиссиясының бірінші отырысы өтті. «Қазтеміржолкәсіп» ҚБ комиссиясының жұмыс жоспарына сәйкес өткен жиынды ашқан сала кәсіподағы төрағасының міндетін атқарушы Ғафу Несіпбаев нәзік жан иелерінің жұмысына сәттілік тіледі.
Комиссия отырысында әйелдердің әлеуметтік-еңбек құқықтарын қорғау, олардың кәсіподақ қызметіндегі рөлін арттыру, сондай-ақ теміржол саласының еңбеккер әйелдерін қолдауға бағытталған бастамаларды дамыту мәселелері талқыланды. Сонымен қатар корпоративтік мәдениетті нығайту, еңбек жағдайларын жақсарту және әйелдердің кәсіби және жеке өсуі үшін қолайлы орта құру мәселелеріне ерекше назар аударылды.
Бұдан кейін өңірлерден келген өкілдердің комиссия жұмысы туралы баяндамасы тыңдалып, комиссия қызметінің тиімділігін арттыру бағытындағы жаңа ұсыныстары мен бастамалары таныстырылды.
Кездесу қорытындысы бойынша нақты ұсынымдар әзірленіп, алдағы кезеңге арналған жұмыс жоспарының басым бағыттары бекітілетін болды. Қатысушылар әлеуметтік мәселелерді шешудегі әйелдердің рөлін одан әрі күшейту және белсенді нәзік жан иелеріне білім беру көкжиегін кеңейту, сондай-ақ жергілікті жерлерде жұмысты жандандыру қажеттігін атап өтті.
– Отырыс сындарлы және іскерлік ахуалда өтіп, қатысушылардың жоғары белсенділік деңгейін және олардың кәсіподақ қозғалысын дамытуға қызығушылығын растады. «Қазтеміржолкәсіп» ҚБ әйелдерді қолдау, олардың мәртебесін нығайту және әлеуетін толыққанды іске асыру үшін жағдай жасау бойынша жүйелі жұмысты жалғастырады, – деп атап өтті «Қазтеміржолкәсіп» ҚБ төрағасының орынбасары Амангелді Төреғожин.
Жиын көпшілік көңілінен шығып, осындай басқосудың пікір алмасып, тәжірибе молайтуда маңызы зор деген тұжырыммен түйінделді.