Астанада Транскаспий халықаралық көлік бағытын дамыту мәселелері талқыланды
Астанада Транскаспий халықаралық көлік бағытының (ТХКБ) Үйлестіру платформасы аясындағы үшінші ұлттық семинар өтті, деп хабарлайды Rail-news.kz.
Іс-шараға Қазақстан Республикасының Көлік вице-министрі Талғат Ластаев пен Қазақстандағы Еуропалық одақ делегациясының елшісі Алешка Симкич қатысты.
Семинар барысында Талғат Ластаев Орта дәліздің Қазақстан үшін стратегиялық маңызға ие екенін атап өтіп, елдің көлік-логистика саласындағы тұрақты даму қарқынына тоқталды.
Кездесу кезінде Ташкентте өткен инвесторлар форумынан және жоғары деңгейдегі онлайн кездесуден кейін атқарылған жұмыстардың нәтижелері қорытындыланды. Қатысушылар дәліз бойындағы басым инфрақұрылымдық жобалардың жүзеге асырылу барысын талқылады. Оның ішінде порт инфрақұрылымын жаңғырту, теміржол және автомобиль жолдары желілерін дамыту мәселелері қаралды.
Сондай-ақ Каспий теңізіндегі өткізу қабілетін арттыру, тар орындарды жою, флотты дамыту және теңіз инфрақұрылымына қатысты бастамаларды іске асыруға ерекше назар аударылды.
Семинардың жеке сессиясында сауда рәсімдерін жеңілдету, кедендік әкімшілендіруді жетілдіру және мультимодальды тасымалдарды дамыту мәселелері талқыланды. Бұдан бөлек, халықаралық қаржы институттарының қарауына ұсынылатын жаңа жобалар таныстырылды.
Жиын қорытындысы бойынша тараптар Транскаспий халықаралық көлік бағытын одан әрі дамытуға дайын екендерін растады. Сонымен қатар инфрақұрылымдық инвестициялар тарту және көлік жүйелерін цифрлық интеграциялау бағытындағы бірлескен бастамаларды қолдайтындарын мәлімдеді.
Айта кетейік, Транскаспий халықаралық көлік бағыты немесе Орта дәліз Қытай мен Орталық Азия елдерін Каспий теңізі, Кавказ және Түркия арқылы Еуропа нарықтарымен байланыстырады. Соңғы жылдары бұл бағыт Еуразиядағы маңызды көлік дәліздерінің біріне айналып отыр.