Елордада көлік және логистика саласында ірі халықаралық форум өтті
«Қазақстан теміржолшысы» газетінің тілшісі
Астанада «Central Asia Transport, Logistics & Investment Forum 2026» форумы өтті. Бұл – көлік, логистика және инвестициялық ынтымақтастықты дамытуға арналған негізгі халықаралық алаңдардың бірі.
Форум мемлекеттік органдардың, халықаралық қаржы институттарының, жетекші логистикалық операторлардың, инвесторлар мен инфрақұрылымдық компаниялар өкілдерін біріктіретін, Орталық Азияның көлік-логистика саласының болашағын және оны жаһандық сауда маршруттарына интеграциялауды талқылауға арналған жоғары деңгейдегі алаңға айналды.
Іс-шараға 25 елден 200 астам логистикалық сарапшылар мен кәсіпқойлар қатысты. Орталық Азияның көлік логистикасы саласындағы басты оқиға саналатын форумда Еуразияның көлік картасын өзгертетін мәселелер талқыланды, яғни халықаралық дәліздерді дамыту, контейнерлік тасымалдардың өсуі, логистиканы цифрландыру, инвестициялар тарту және мультимодальды маршруттардың тиімділігін арттыру мәселелері көтерілді.
Бірінші сессияның тақырыбы Еуразияның әлемдік логистикадағы рөлі болды. Сарапшылар сауда ағындарының қалай өзгеретінін, қандай маршруттар сұранысқа ие болатынын және бұл аймақ елдері үшін қандай мүмкіндіктер ашатынын талдады. Шығыс пен Батыс арасындағы негізгі транзиттік бағыттар өтетін ел – Қазақстанға ерекше назар аударылды. Сондықтан көлік инфрақұрылымын, халықаралық ынтымақтастықты және логистикалық сервистерді дамыту бүгінде өңірдің бәсекеге қабілеттілігінің маңызды факторларының бірі болып қала береді.
Ал форумның екінші күні «Көлік дәліздерінің болашағы: ағындарды кім басқарады» тақырыбында C-level деңгейіндегі жабық стратегиялық сессия өтті. Форумға KAZLOGISTICS Қазақстан көлікшілер одағы ресми ақпараттық қолдау білдірді.