Арнайы пойыз жолға шықты
«Қазақстан теміржолшысы» газетінің тілшісі
Қазақстанда алғаш рет есірткіге қарсы пойыз іске қосылды. Астана – Бурабай бағыты бойынша жолға шыққан пойызда тәртіп сақшылары жолаушы халықты есірткіден бас тартуға шақырып, ситуациялық жағдайда көмек беретін қызметтер туралы ақпаратпен бөлісетін болады.
«Астана – есірткісіз қала!» ерекше жобасын Астана қаласының полиция департаменті мен Көліктегі полиция департаменті «Жолаушылар тасымалы» АҚ, Елорда әкімдігі және «Астана жастары» жастар ресурстық орталығы еріктілерінің қолдауымен ұйымдастырды.
Пойыз 12 тамызда «Нұрлы жол» вокзалынан жолға шықты. Алдымен вокзалдың күту залында полицейлер, еріктілер, спортшылар және қоғамдық ұйымдар өкілдерінің қатысуымен «Астана – есірткісіз қала!» акциясы өтті. Вагондардың сырты мен іші есірткіге қарсы материалдармен безендірілген. Олар заңды сақтауға, есірткіден бас тартуға және салауатты өмір салтын ұстануға шақырады.
Пойыз күн сайын жүреді. Ұйымдастырушылар профилактикалық бағыттағы ақпарат беру акциясы тек бір күнмен шектеліп қалмайтынын айтады. Жолаушыларға сенім телефондары мен көмек сұрауға болатын қызметтердің байланыс деректері бар буклеттер таратылды. Вокзалда есірткіге қарсы бейнероликтер көрсетілді.
Акция тек пойызды іске қосумен шектелмеді. Елорда тұрғындары мен қонақтары үшін есірткіні қолданудың салдары туралы суреттер көрмесі, концерт және интерактивті алдын алу алаңдары ұйымдастырылды. Астана полиция департаментінің есірткі қылмысына қарсы іс-қимыл басқармасының бөлім бастығы Әлия Қибатқызы атап өткендей, құқықбұзушылықтың алдын алу – бұл құқық қорғау органдарының жұмысы ғана емес, сонымен қатар қоғамның және әрбір адамның жалпы жауапкершілігі. Сондықтан жобаға жастар, еріктілер, спортшылар және қоғамдық ұйымдар тартылды. Міндет – есірткінің салдары туралы ескерту ғана емес, қауіптен тұрақты түрде бас тартуды қалыптастыру және салауатты өмір салты, заң және жеке жауапкершілік күнделікті мәдениеттің бір бөлігіне айналуы керек екенін көрсету.
Жаңа пойыз жобасы «Астана – есірткісіз қала» жоспары аясындағы ауқымды жұмыстың бір бөлігі саналады және «Заң мен тәртіп» қағидаты шеңберінде іске асырылуда.