IQAS – тіл мерекесіне арналған QUIZ
«Қазақстан теміржолшысы» газетінің тілшісі
«ҚТЖ» ҰК» АҚ-да 5 қыркүйек – Қазақстан халқының тілдері күні қарсаңында «Ана тілім – ардағым» атты IQAS квизі өтті. Мемлекеттік тілді дамыту секторының ұйымдастыруымен өткен білім сайысына 11 команда қатысты.
Аталған сектор басшысы Ербол Тоқтағазы қатысушыларға сәттілік тілеп, бұл жарыс компаниядағы мемлекеттік тілдің қолданыс аясын кеңейту бағытында атқарылып жатқан жұмыстың бір бөлігі екенін жеткізді. Ал қазақша квиздің авторы Мерей Ермұханов жарыс 4 кезеңнен тұратынын жеткізіп, сұрақтар мазмұнына шолу жасап өтті.
Компанияның кітапханасында өткен жарыста түрлі департаменттерде жұмыс істейтін қызметкерлер 4 адамнан тұратын команда құрып, оған ұлттық атаулар берді. Командалық жарыстың бірінші кезеңі – «Кіріспе» турында қатысушыларға 4 жауап нұсқасы бар 7 сұрақ берілді, олардың әрқайсысына сайыскерлер 30 секундта жауап беруі тиіс болды. Сұрақтар қазақ әдебиеті мен тарихына қатысты болды. Екінші кезең – «Сөзжұмбақ» деп аталды. Үшінші кезең – «Байланыс» деп аталып, қатысушылар 10 сұраққа жауап берді. Төртінші «Ақтық мәре» турында әрқайсысына 1 минут уақыт берілетін 7 сұрақ қойылды. Сауалдардың бәрі логикаға негізделген.
Квиз нәтижесінде 11 команданың ішінде бас жүлдені «I 100 DI» командасы иеленсе, 1-орын «Сарыарқа» тобына, 2-орын «Алаш рухы» командасына берілді және 3-орынды «Қуырдақ» пен «Береке» командалары өзара бөлісті.
– QUIZ өте қызықты әрі жоғары деңгейде ұйымдастырылды. Сұрақтары мазмұнды, танымдық және ойлануға мүмкіндік берді. Қатысушыларға ерекше көңіл-күй сыйлап, ана тіліміздің қадір-қасиетін тағы бір рет сезінуге ықпал етті. Осындай рухани танымдық әрі қызықты шаралар жиі ұйымдастырылып тұрса дейміз, – дейді компанияның Техникалық орталығының бас менеджері, «Алаш рухы» командасының қатысушысы Азамат Маңғытаев.
Жеңімпаздар бағалы сыйлықтармен, барлық қатысушылар ынталандыру сыйлықтарымен және Алғыс хаттармен марапатталды.
