Астанада 320-дан астам теміржолшы сенбілікке қатысты
Астанада көшелерді санитарлық тазалау және абаттандыру бойынша ұйымдастырылған жалпықалалық сенбілікке 320-дан астам теміржолшы қатысты, деп хабарлайды Rail-news.kz.
Экологиялық іс-шара «Таза Қазақстан» жалпыұлттық акциясын қолдау мақсатында елорданы санитарлық тазарту, абаттандыру және көгалдандыру бойынша өткізіліп жатқан жалпықалалық айлық аясында ұйымдастырылды.
Сенбілік басталар алдында барлық қатысушыға қауіпсіздік техникасы бойынша нұсқаулық жүргізілді.
Теміржолшылар Ұлы дала даңғылының оң жағындағы көпірден Шерхан Мұртаза көшесіне дейінгі аумақты тазартты. Қызметкерлер көшелер мен іргелес аумақтардағы тұрмыстық қоқыстарды, сынған және қураған бұтақтарды, құрғақ өсімдіктерді, қаңылтыр қалдықтары мен шыны бөтелкелерді жинады.
Сенбілік барысында жиналған барлық қалдық белгіленген орындарға шығарылып, одан әрі кәдеге жаратуға жіберілді.
Экологиялық акцияға қатысқан теміржолшылар елорданың тазалығы мен көркін сақтауға үлес қосып, қоршаған ортаға жауапкершілікпен қараудың үлгісін көрсетті.