Бейнет түбі – зейнет
«Қазақстан теміржолшысы» газетінің тілшісі
«Қазтеміртранс» АҚ ұжымы компанияның клиенттермен жұмыс департаментінің шағымдарды қарау және реттеу тобының бас менеджері Гузель Абушахминаны құрметті зейнет демалысына салтанатты түрде шығарып салды.
Теміржол саласына 30 жылдан астам өмірін сарп еткен тәжірибелі маманды компанияның бас директоры Александр Ширяев бастаған ұжым құттықтап, оның көп жылғы адал еңбегі, жоғары кәсібилігі, жауапкершілігі және компанияның жұмысына, жалпы теміржол саласын дамытуға қосқан елеулі үлесі үшін алғыс айтты.
Гузель Абушахминаның теміржол саласындағы кәсіби жолы 1991 жылы Тастақ станциясында жүк қабылдаушы болып басталды. Дәл осы жерден ол кәсіби маман болып қалыптасты. Теміржол саласына деген қызығушылық, білсем, меңгерсем деген ұмтылыс және жүк тасымалының ерекшелігін терең түсіну оған үлкен мансаптық жолдан өтуге мүмкіндік берді.
Жүк және коммерциялық жұмыс бойынша жетекші инженер, бөлім бастығы, бас сарапшы және бас менеджер болып жұмыс істеді. Қай қызметті атқарса да талапшылдығы, нормативтік-құқықтық базаны терең білуі, көптеген құжаттармен жұмыс істей алуы, даулы жағдайларды объективті бағалауы және барлық тараптардың мүдделерін ескеретін шешімдерді табуы оның абыройын арттырды.
Жүк тасымалдау және шағымдарды реттеу мәселелерінде айтарлықтай кәсіби тәжірибе жинақтады. Өз қызметінде халықаралық тасымал және тиісті нормативтік құжаттар мен келісімдерді қолданумен байланысты мәселелер бойынша жұмыс істей отырып, ТМД елдерінің теміржол әкімшіліктерімен өзара ынтымақтастықта жұмыс істеді.
– Біздің сала – үлкен сағат механизмі сияқты, мұнда әр құрылым үйлесімді жұмыс істеуі керек. Мен әрқашан сене алатын адам болуға тырыстым, әсіресе қиын жағдайда мәселені оңтайлы шешуге барымды салдым, – дейді Гузель Абушахмина.
Кәсіби жолын енді ғана бастаған жас мамандарға бәрін түсініп, бәрін меңгеріп, нағыз маман болып қалыптасу үшін қызметті ең төменгі лауазымнан бастау керектігін айтты. Сонымен қатар сүйікті ұжымына өзіне көрсетілген қолдау мен жүктелген сенім, компанияда жұмыс істеген уақытында қалыптасқан жылы қарым-қатынас үшін алғысын білдірді.