Вокзалдарда бақылау күшейтілді
2026 жылғы 14-15 қазан аралығында Көліктегі полиция департаменті аумақтық бөліністермен бірлесе отырып, «Іздеу» республикалық жедел-профилактикалық іс-шарасын өткізуде, деп хабарлайды Rail-news.kz.
Ауқымды акция көлік инфрақұрылымы объектілерінде қоғамдық қауіпсіздікті қамтамасыз етуге және құқық бұзушылықтардың алдын алуға бағытталған.
Жедел-профилактикалық іс-шараның басты мақсаты – қылмыс жасап, тергеу мен соттан бой тасалап жүрген, сондай-ақ мемлекетаралық және халықаралық іздеуде тұрған кылмыскерлерді анықтау әрі ұстау. Бұдан бөлек, хабар-ошарсыз кеткен азаматтардың орналасқан жерін анықтауға және жеке басы танылмаған мәйіттерді сәйкестендіруге баса назар аударылуда.
Іс-шара аясында көлік полицейлері теміржол вокзалдарында, әуежайларда және жолаушылар пойыздарында тексеру әрекеттерін күшейтті. Тәртіп сақшылары іздестіру базалары бойынша тексеруді жиілетіп, халықаралық әріптестік шеңберінде ақпарат алмасуды жандандырды.
Көліктегі полиция департаменті өкілдерінің айтуынша, мұндай алдын алу шаралары жолаушылар тасымалының қауіпсіздігін арттыруға, қылмыстың жолын кесуге және жедел іздестіру қызметінің тиімділігін арттыруға зор мүмкіндік береді. Іс-шара қорытындысы бойынша атқарылған жұмыстардың нәтижелері жарияланатын болады.