Семейде қараусыз мал қамау «изоляторына» тоғытылуда
Абай облысы бойынша меншікті тілші
Семей ЖТ бөлімшесі бойынша желі бойындағы қараусыз мал мәселесі күн тақырыбынан түспей тұр. Шұғыл тежелу бойынша ағымдағы жылдың 5 айы ішіндегі көрсеткіш көңіл көншітпеуде...
Әсіресе, Дегелең – Жаңа-Семей телімі бойынша орын алған ахуал ерекше алаңдаушылық туғызды. Жуырда Семей магистральдық желі бөлімшесі басшылығы аталмыш телім бойынша бірнеше мәрте рейдтік шаралар ұйымдастырды. Соның ішінде желі бойына 500 метрдей жақын орналасқан 15 шаруа қожалығына жолығып, түсіндіру жұмыстарын жүргізді. Сонымен қатар, аталмыш бағыт бойынша қолға алынған бір жаңашылдық – олардан желі бойына қараусыз мал жібермеу туралы қолхат алынды. Оған басты себеп Дегелең – Известковый телімі аралығында тепловоздың ірі қарамен соқтығысуы болып отыр. Шығын келтірген мал иесі дер кезінде анықталып, айыппұл салынған болатын.
Осыдан соң теміржолшылар тәртіп сақшыларымен бірлесіп шұғыл шараларға көшуді қолға алды. Атап айтсақ, желі бойында қараусыз жайылған төрт түлікке арналған уақытша қамау «изоляторы» ашылып, қолға түскен қара мал осы «изоляторға» тоғытылыпты. Аталмыш шара бірден өз нәтижесін беріпті. Не бары бір ай ішінде 100-ден аса түлік уақытша оқшауланып, иелеріне қомақты айыппұл салынды. Биыл ғана қол жеткізілген бұл шаралар желі бойындағы теміржолшыларға біршама жеңілдік туғызуда. Себебі, ауа жайылған мал күрт азайған.