Ұн тиелімі азайған
Шымкент қаласы бойынша меншікті тілшісі
Логистика мамандары аймақта биыл ұн өнімдерін экспорттау көлемі азаяды деген болжамы расқа айналған сынды. Бір ғана мысал, 2018 жылдың 8 айының есебі бойынша 5700 вагон ұн тасымалданса, биылғы сегіз айда 4192 вагон ұн тиелген.
Демек, өткен жылмен салыстырғанда 1508 вагонға азайып кеткен. Мамандар ұн тасымалының азаю себебін қазіргі таңда Өзбекстанның өздерінің ұн өнімдерін дайындайтын өндіріс орнын салып, пайдалануға берілуімен байланыстырып отыр.
«Қазақстаннан бұрын ұн өнімін көбіне Өзбекстан және басқа да сырт мемлекеттер алатын. Қазір көбіне бидай күйінде алып, ұнды алып жатқан жоқ. Себебі, өз диірмендерін іске қосқан соң өзбектерге бидай күйінде алған тиімді болып отыр. Біздің жоспардан қалып жатқанымыз және жүк тасымалының төмендеп кету себебі сол», – дейді Шымкент ЖТ бөлімшесіндегі логистика және тасымалдауды ұйымдастыру бөлімінің жетекші инженер-технологы Қайнар Исаев.