Өнертапқыштар еңбегі бағалануда

Аягөз белгі беру және байланыс дистанциясының теміржолшылары өндіріске жаңашылдық енгізу бойынша биыл да тың көрсеткіштерге қол жеткізді.

Осыған дейін де экономикалық тиімділікті еселеу мен үнемдеу мәселесінде соны жетістіктерге қол жеткізіп жүрген аягөздіктер ағымдағы жылдың 9 айы бойынша 6 ұсыныс жасап, оның ішінде бесеуі техникалық комиссия тарапынан толықтай мақұлданған. Өнертапқыштардың арасында осыған дейін де жаңашылдық енгізудегі ерекше белсенділігімен танылған қызметкерлер көп. Мәселен, Аягөздегі ШЧ-30 бас инженері Ерғазы Ережепов пен техникалық құжаттандыру инженері Ерсайын Чукеевті атауға болады.

Ерғазы Айтқазыұлының бастамасымен Аягөз станциясындағы ДСП таблосындағы сұлба жұмысын бақылаудың жаңа тиімділігі ойлап табылған. ЭЦ-дағы жұмыс барысын жеделдететін бұл шара сынақтан сәтті өтіпті. Соның нәтижесінде аягөздік озат рационализаторға еңбегіне сай авторлық сыйақы табыс етіліпті.

Сол тәрізді өнертапқыш бас инженердің тәжірибесінен туған тағы бірқатар жаңашыл шаралар бүгінде Қапанбұлақ, Нарбота, Қарақойтас, Балықтыкөл, Суырлы, Желдіқара тәрізді бірқатар станциялар бойынша қолданысқа еніпті. Мұнымен қоса, Үшбиік – Еңірекей қумажолы бойындағы импульсті рельстік желіні іске қосу сұлбасын электрохимиялық әсерден қорғау бойынша жаңашылдық енгізген ШЧ-30 теміржолшылары да арнайы бұйрық аясында сыйақылы болған. Айта кетерлігі, бір мекемеде жұмыс істейтін екі аягөздіктің осы реттегі жалпы еңбектерінің саны 20-дан асады екен. Сондықтан да, Нұр-Сұлтан қаласындағы техкомиссияның қарауына «Үздік рационализатор» атағына ұсынылыпты. – Біздің мекемеміз бойынша өндіріске енгізілген жаңашылдықтардың басым көпшілігі қызметкерлердің еңбектерін жеңілдету мен экономикалық тиімділікті еселеуге бағытталған. Биыл 5 ұсыныс толық мақұлданып, өндіріске енгізілді. Тағы бір ұсыныс бекітуге жіберілді. Сонымен қатар, жыл сайын өзге бөлімшелердегі байланыс дистанцияларынан тағы екі рацұсынысты үлгі ретінде күнделікті қызмет барысында қолданысқа енгіземіз, – дейді бұл ретте техникалық бөлімнің бірінші категориялы инженері Мейрамгүл Ережепова. Қазіргі таңда Айдос Жұлдызбаев жетекшілік ететін мекеме өндіріске жаңашылдық енгізу жөнінен Семей магистральдық желі мекемелері арасында алғашқы орында тұр.