Тиімділік деген осы
Биыл Шымкент жүк тасымалы бөлімшесінде біраз қызмет түрлері ақша үнемдеген.
Атап айтсақ, жыл басынан бері тоғыз айда локомотивтерді тиімді пайдалану және станцияда вагондардың тұру уақытын азайту жұмыстарын жүргізу нәтижесінде дизель отыны шығыны былтырғы жылмен салыстырғанда 701 тонна үнемделген.
Ал өткен жылы дизель отыны шығыны 19 мың 332 тонна болса, осы жылдың тоғыз айында 18 мың 631 тоннаны құраған. Бөлімшенің маман дары отынның үнемделуіне Сарыағаш станциясында жаңадан салынған қосымша 4 жолдың септігі тигенін айтады. Өйткені, станцияға Өзбекстаннан келген ұзындығы 57 шартты вагонды құрайтын пойыздарын шашып, қосымша 4 жол арқылы ұзындығы 71 шартты вагонды құрайтын ұзынқұрамды пойыздар құрастырылып, Арыс станциясына жіберілген. Нәтижесінде, Сарыағаш станциясында пойыздардың өткізу қабілеті 26 жұптан 30 жұпқа дейін артқан. Оған қоса, станцияның технологиялық процесі қайта қаралып, пойыздарды өңдеу уақыты қысқартылған. Жалпы, локомотивтерге сервистік қызмет көрсету бойынша 547 млн теңге үнемделген. Неге десеңіз, локомотивтер ТО-2-ден 36-48 сағат арасында өту керек болса, №334 бұйрығына сәйкес уақыт ұзартылып, 120-144 сағатта өту бекітілген. Сонымен қатар, тағы басқа да үнем әкелген табыс көзіне тоқталсақ, қосалқы көмекші қызметінен түсетін табыстар жоспар бойынша 115 млн теңгеге көзделген болса, іс жүзінде 167 млн теңгені құрап, кіріс сомасы 52 млн теңгеге артық орындалыпты. ТОР бойынша 106 млн теңге болса, нақтысы 151 млн теңгені құрап, 45 млн теңгеге немесе 143%-ға көбейген. Себебі, ағымдағы ағытпалы жөндеу көлемі 1717 вагонға өскен.
Меңлібай станциясы бойынша тауарлық кассирлер мен жүк қабылдаушылардың қызмет көрсетуі есебінен кіріс сомасы 62 млн теңгеге артқан. Өткен жылмен салыстырғанда табыстың 62 млн теңгеге өсуінің себебі ағымдағы ағытпалы жөндеу көлемі 854 вагонға өскен. Негізгі қызмет бойынша шығындар жоспары 20 млрд 818 млн теңге болса, іс жүзінде 19 млрд 160 млн теңге немесе 92%-ға орындалып, нәтижесінде 1 млрд 658 млн теңге, отын бойынша 492 млн теңге үнемделген. Бұған 1 тонна отын бағасының 1915 теңгеге төмендеуі де себеп болған көрінеді.