Президент марапаттаған теміржолшы
Тәуелсіздік күні мерекесіне орай «Қазақстан темір жолы – Жүк тасымалы» АҚ – Жамбыл филиалының теміржолшысы Николай Хомутенко Президент Қасым-Жомарт Тоқаевтың қолынан «Еңбек даңқы» орденімен марапатталды.
Өңірдегі теміржол саласында 40 жылдан астам уақыттан бері жұмыс істеп келе жатқан Николай Николаевич қазіргі таңда Жамбыл вагон депосының аға инспекторы болып қызмет атқарады. «Бүгін менің өмірімдегі ең салтанатты және маңызды күн деп білемін. Мұндай жоғары марапатты ел Президентінің қолынан алу бақыты бұйырғанына өте қуаныштымын. Бұл сый мен үшін күтпеген жағдай болды. Мен өз жұмысымды мақтан тұтамын. Теміржол – менің тағдырым және менің өмірім. Еңбегімді ескерген Жамбыл жол бөлімшесінің басшылығына рахмет! Бұл – барша теміржолшылардың еңбегіне берілген баға», – дейді марапат иесі.
Николай Хомутенко биыл 62 жасқа толды. Еңбек жолын қарапайым ғана вагон жөндеушіден бастапты. Ол әулетіндегі үшінші буын теміржолшы. Атасы локомотив депосында ұзақ жылдар еңбек еткен екен. Николайдың өзі де осы уақыт аралығында көптеген шәкірт тәрбиелеп өсірген.
«Біле білгенге вагон инспекторының жұмысы өте күрделі, терең білімді, тәжірибе мен жауапкершілікті талап етеді. Өйткені, вагондардың техникалық жағдайына жүк пен жолаушылардың қауіпсіздігі және пойыздар кестесінің сақталуы тығыз байланысты. Николай Николаевичтің ауысымындағы инспекторлар бүгінгі марапат иесінен үлгі алады. Николай оларға сауатты тәлімгер болды деп білеміз», – дейді Жамбыл жүк тасымалы бөлімшесінің басшылығы.
Николай Хомутенко отбасымен де айналасына үлгі танытып отыр, мәпелеп өсірген үш баласы әр салада қызмет етеді. Айта кетейік, «Еңбек даңқы» ордені бір кәсіпорында ұзақ уақыт жемісті жұмыс істеген, сондай-ақ еңбек өнімділігінің артуына, ұлттық экономиканың бәсекеге қабілеттілігін жетілдіруге ықпал еткен азаматтарға өндірістегі ең жоғары көрсеткіштері үшін тапсырылады. Осындай үдеден шыққан жамбылдық теміржолшыны біз де марапатымен құттықтаймыз.