Семей станциясында кәсіподақ комитетінің жетекшісін сайлауы өтті
Абай облысы бойынша меншікті тілші
Жуырда Семей станциясында мекеменің кәсіподақ комитетінің жетекшісін сайлау жиыны болып өтті. Оған теміржолшылар кәсіподағының Семей өңірі бойынша төрағасы Алик Досанов пен станция теміржолшылары, сала ардагерлері қатысты.
Жиын барысында сөз алған станция басшысы Алтынбек Мәмбетов жүзге жуық адам еңбек ететін мекеменің өндірістен тыс қоғамдық-саяси өміріне тоқталып, сөз кезегін станциядағы кәсіподақ ұйымының төрайымы Шәрбат Мейірмановаға берді.
Өткен жылға есеп берген кәсіподақ төрайымы станциядағы еңбек қатынастары мен теміржолшыларының әлеуметтік ахуалын жақсартуға бағытталған іс-шаралар қатарын әңгімеледі. Ұжымдық келісімшарт аясындағы жұмыстарды да тілге тиек етті. Кәсіподақ қызметінде он жылға таяу уақыт еңбек етіп келе жатқан Шәрбат Төлеубекқызы осыдан бес жыл бұрын дауыс беру кезінде көпшілік сеніміне ие болған еді. Жалпы, бөлімшедегі ең іргелі ұжым саналатын Семей станциясының қоғамдық өмірі мейлінше жарқын.
Спортшылар кәсіподақ ұйымының демеушілігімен спорттық формамен, құралдармен қамтылған. Теміржолшылар жылдың әр мезгілінде табиғат аясында бой жазып, түрлі іс-шаралар өткізеді. Есептік баяндаманы тыңдап шыққан салалық кәсіподақ комитетінің басшылары қанағаттанарлық деп баға берді.
Ал дауысқа салу барысында Семей станциясының қызметкерлері бірауыздан дауыс беріп, Шәрбат Төлеубекқызы қайта сайланды. Бұл кәсіподақ жетекшісінің үлкен сенімге ие болғанын көрсетеді.