Тасқын су кезінде бейнекамерамен бақылануда
«Қазақстан теміржолшысы» газетінің тілшісі
«ҚТЖ» ҰК» АҚ – Магистральдық желі дирекциясы көктемгі тасқын су кезінде жолдар мен жасанды құрылыстардың тұрақты жұмысын және сақталуын қамтамасыз ету мақсатында бірқатар ұйымдастырушылықтехникалық шараларды жалғастыруда.
Өткен жылдардың талдауын есепке ала отырып, барлық аймақ бойынша су басу қаупі бар жерлер, өзен-көлдер, құбырлар, көпірлер, тағысын тағы 670-тен астам жер анықталып, сол жерлерде бақылау күшейтілген.
– Әзірге аса қауіп төндіріп тұрған жағдай байқалмайды. Тасқын су болуы ықтимал деген жерлерге жауапты тұлғалар тағайындалып, тәулік бойы кезекшілік қойылған. Бұған қоса қосымша тексерулер өткізіліп, қауіпті жерлерге шолу жасалуда. Бүгінде көпірлер, құбырлар, құдықтар қардан тазартылып, су арналары, арықтар аршылған. Атбасар теліміндегі Жабай өзеніне бейнекамера қойылып, үнемі бақылау жасалып отыр, – дейді Дирекцияның қозғалыс қауіпсіздігі жөніндегі атқарушы директоры Бахытбек Алдажаров.
Еске сала кетсек, бүгінде Дирекция әлдеқандай жағдай бола қалса, ағын суды тоқтатуға қойтастар, рельс пакеттері, кондициялық емес темірбетон шпалдар тиелген 42 пойыз дайындап қойған. Мұнымен қатар жол дистанциялары 2500 текше метрге жуық қойтас пен 6400 бірлік шамасында кондициялық емес темірбетон шпалдар дайындап отыр. Яғни, теміржолшылар қазіргі елдегі төтенше жағдайға қарамастан, табиғи залалдың алдын алуға тастүйін дайын деген сөз.
Сонымен қатар, осыған дейін біз Шығыс Қазақстан облысында «ҚТЖ» ҰК» АҚ – «Магистральдық желі дирекциясы» филиалының теміржолшылары көшкін қаупін сейілткен бірқатар іс-шаралар өткізгенін хабарлаған болатынбыз. Атап айтқанда, көшкін қаупі бар учаскелерден қарды мәжбүрлі түсіру үшін қажетті жарылыс жұмыстары жүргізіліп, жасанды құрылғылар қар мен мұздан тазартылған.