Тепловоз машинистері 4 мәрте жедел тежегіш басуға мәжбүр болған
Қызылорда облысы бойынша меншікті тілші
Қызылорда темір жолының солтүстік аумағындағы Сексеуіл-Қоскөл жаңа телімі мен Сексеуіл-Аралқұм бекеттері арасында пойыздардың қозғалыс қауіпсіздігінің сақтауына жауап беретін Сексеуіл жол дистанциясының теміржолшылары жыл басынан бері қауіпсіздіктің бұзылуына жол бермеген.
Дегенмен, теміржол – қозғалыс ортасы болғандықтан түрлі кедергілер жоқ емес, осы уақыт аралығында тепловоз машинистері 4 мәрте жедел тежегіш басуға мәжбүр болған. Оның үш жағдайында жолға иесіз мал шыққан болса, біреуінде бөгде адам рельс үстіне шығып қозғалысқа кедергі келтірген.
Дистанция теміржолшылары жолдардың бабын жасаумен қатар иесіз малдың жолға шығып кетпеуінің алдын алу үшін жергілікті ауыл әкімдіктеріне хат жолдап, теміржолдың қауіпті аймақ екенін түсіндіру жұмыстарын жүргізуден кенде емес. Түсіндіру жұмыстарына кейде жергілікті билік өкілдері мен полиция өкілдері де қатыстырылады.
Мәселен дистанция тарапынан Қарақұм, Шижа, Сексеуіл және Арал ауданы әкімдігіне Күршек және Октябрь ауылдық окургі тұрғындармен түсіндіру жұмыстарын жүргізілуін сұрап 13 мәрте хат жолданып, теміржолға жақын қоныстанған елді-мекен тұрғындарымен түсіндіру жұмыстары жүргізілген, бірақ одан нәтиже шамалы болып, қауіп сейілмей тұр.
Насихат жұмысына орай тұрғындармен 3 рет жиын өткізіліп, 553 адамға ҚР кодексінің 559 бабының 1-5 тармақтарынан үзінділер таратылған. Мал шаруашылығы иелеріне де теміржол бойында мал жаю қауіпті екендігі түсіндіріліп, теміржолда арнайы белгіленген жерден өту керектігі жөнінде 103 мектеп оқушысы құлағдар болған.
– Дистанция бойынша есептегі 15 теміржол өткелінің 4-уі күзетілетін болса, 11 өткелде күзет қойылмаған. Дегенмен әр айда кемінде екі мәрте өткелдегі жағдай жоспарлы және тосыннан тексеріледі. Жыл басынан бері 16 рет тексеру өткізіліп, рейд жұмысына теміржолшылармен қатар жергілікті ауылдық округ және жол полициясы өкілдері қатыстырылды. Рейд жұмысы кезінде теміржолда қауіпсіздікті сақтау, теміржол өткелінен өту жайлы ережелерімен 3227 автокөлік иесі таныстырылып, түсіндіру жұмыстары жүргізілуде, жалпы қауіпсіздікке еш кедергі жоқ, – деді дистанцияның жол инженері Бауыржан Төлегенов.