«Жеңіс» жобасын жүзеге асырады

«Қазақстан темір жолы» ұлттық компаниясының "Әлеуметтік жобалардың қоры" корпоративтік қоры «Самұрық Қазына Траст» әлеуметтік жобаларды дамыту қорының «Жеңіс» жобасын жүзеге асыру сеніміне ие болып отыр.

«Самұрық Қазына Траст» қоры елімізде әртүрлі әлеуметтік жобаларды жүзеге асырумен айналысады. Бұл жолы олар «Жеңіс» жобасын «ҚТЖ» компаниясының Корпоративтік даму қорына табыстап отыр. Оның өзіндік себебі де бар. Ұлттық компания бұған дейін көптеген әлеуметтік жобаларды іске асырып келеді. Биыл да мысалы, Еріктілер жылы аясында теміржолшылар «2020 игі іс» бағдарламасын қолға алып, оны табысты жүзеге асырып жатқан белсенділігімен танымал болып отыр. Сондықтан ҚТЖ-ның әлеуметтік жобаларда жүзеге асыруда бай тәжірибесі бар екені белгілі.

– Ал «Жеңіс» жобасына келсек, ол еліміздің 35 қаласында және нақты бір аудандарында іске аспақ. Теміржолшылардан анықталған жоба үйлестірушілері жергілікті атқарушы органдармен, әкімдіктермен және ардагерлер кеңестерімен бірлесе жұмыс істеп, әр өңірден 40 жуық соғыс ардагері мен тыл еңбеккерлеріне азық-түлік себеттерін жылына кем дегенде 3-4 рет тарататын болады. Бүгінгі күнге дейін 500ге жуық ардагер азық-түлік себетімен қамтамасыз етілсе, әлі алда 1500 жуық ардагерді қамту жоспарланып отыр. Теміржолшы жастар азық-түлік себетін тарату барысында барлық сақтық шараларын ұстануда. «Жеңіс» жобасына үн қосуға ниетті еріткілер болса, қатысып, өз үлестерін қосуға болады. Бұл туралы ақпараттарды әлеуметтік желілерден таба алады», – деп ақпаратпен бөлісті Ұлттық компанияның Адами ресурстарды басқару департаментінің менеджері Нәзира Бердібекова.