«Бүйір рамасын бақылау» айлығы мәреге жетті

«Қазақстан темір жолы» ҰК»АҚ бойынша бүкіл ел теміржолында былтырғы 23 желтоқсанда жарияланып, төрт айға созылған «Бүйір рамасын бақылау» айлығы 23 сәуірде мәреге жетті. Бүгінде жер-жерде айлықтың нәтижелері шығарылып жатыр.

Бүгінгі таңда «ҚТЖ-Жүк тасымалы» АҚның вагон шаруашылығы департаментіне аймақтағы бөлімшелер мен вагон пайдалану деполарынан «Бүйір рамасын бақылау» айлығының қорытындылары жолдануда екен.

«ҚТЖ-Жүк тасымалы» АҚ Вагон шаруашылығы департаментінің берген мәліметі бойынша, айлық көлемінде бірнеше жоспарлы шаралар қабылданып, орындалған. Атап айтқанда, аталған қоғамның елдегі барлық филиалдарында бөлімше директорларының төрағалығымен комиссиялар құрылып, жұмыс атқарған.

Шараны өткізу кезіндегі 4 ай ішінде комиссия мүшелері өз аумағына тиесілі вагон шаруашылығы бойынша түбегейлі және тыңғылықты тексерулер жүргізген. Барлық вагон пайдалану деполары айлық барысында вагон депосының инструкторлық-командалық құрамы бойынша тәуліктік кезекшілік кестесін жасаған. Вагон пайдалану депосының басшылары техникалық сабақтарды ұйымдастыруда профилактикалық жұмыстар жүргізіп, пойыздар қозғалысы қауіпсіздігін қамтамасыз етуде қажетті еңбек жағдайының жасалуын қадағалады.

Командалық-инструкторлық құрам күшімен техникалық қызмет көрсету бақылау қосындарындағы ауысымдарда арбалардың ақауын табу әдісіне қатысты кезектен тыс техникалық сабақтар жүргізілді. Мемлекетаралық түйісу нүктелерінде, атап айтқанда вагондар ауыстырылатын Достық, Ақтау порты станцияларында вагондардың техникалық жағдайына бақылау күшейтілді. Осы ретте әсіресе, арбалардың құйма бөліктерінің жағдайына ерекше назар аударылды.

Басқа мемлекеттердің жүк вагондарын қолдану ережелерінің талаптарына сәйкес келмейтін жүк вагондарын қабылдау және өткізуге тыйым салынды. Техникалық бақылау цехтары жұмысшыларын вагон қабылдап алушылар әр ауысым сайын тексеріп отырды. Қисық жол телімдерінен өту кезінде пойыздар мен құрамды бақылау жөнінен пойыз құрастырушылары мен локомотив бригадаларымен тиісті нұсқаулықтар өткізілді.

Сонымен қатар вагондардың экипаж бөлігіндегі жағдайына, жүкті жылжыту бекітпелерінің шанағы жағдайына баса назар аударылды. Пойыздар тоғысқан жағдайда қарсы бағыттан келетін пойызды тексеруге жіті көңіл бөлінді, әсіресе, аталған жылжымалы құрам ақауына күмән туған жағдайда пойызды тоқтату үшін дереу шара қабылдауға дайындық пысықталды.

Жалпы мамандардың айтуынша, бүйір рамасына арнап 4 айлық өткізу жайдан жай емес. Өйткені бұған дейінгі тәжірибе көрсеткендей бүйірлік рама ақауы өте жиі кездесетін кемшіліктердің бірі. Мәселен, былтыр осы бүйір рамасы ақауынан Қазақстан темір жолы бойынша 11 апатты жағдай болған. Бақылаушы ревизорлар бұл айлықтан тыс уақытта да және бүйір рамасынан басқа да ақаулықтар анықталып жататынын айтады.

Бүйір рамалары ақаулары әсіресе «Уралвагонзауыты», «Бежицк болаты», «Кременчугск болат құю зауыты», «Лугансктепловоз», «Люблин ЛМЗ», «Крюков вагон құрастыру зауыты» сынды өндіріс орындарында жасалған вагондарда көп кездесетінні де жасырын емес.

Қазақстан темір жолы бойынша жарияланған төрт айлықтың қорытындысы туралы алдағы уақытта жариялайтын боламыз.