Көктемгі байқау мәреге жетті
«Қазақстан теміржолшысы» газетінің тілшісі
Елдегі төтенше жағдай, карантиндік режим теміржолшыларды дәстүрлі еңбек ырғағынан жаңылдыра алған жоқ. Теміржол бойында қалыпты тірлік: жолаушы пойыздары тоқтағанмен, жүк құрамалары жүріп жатыр. Жылдағы үрдіс бойынша көктемгі комиссиялық байқау да дер кезінде өтті.
«Қазақстан темір жолы» ҰК» АҚ басшылығының бұйрығымен биыл көктемгі комиссиялық байқау 30 наурыз бен 25 мамыр аралығында өткізілді.
Тек бір ерекшелігі, елдегі қалыптасып отырған жағдайға байланысты биылғы жылғы байқауды жергілікті теміржол басшыларының өз күштерімен өткізуі жоспарланған.
Қыстан шыққаннан кейін инфрақұрылым нысандарын жазғы жұмыс жағдайына дайындау мақсатында өткізілетін дәстүрлі шараны жергілікті теміржолшылар өз деңгейінде өткізе білді.
Жылдағыдай бөлімше басшыларының қатысуымен құрылатын комиссиясыз, жергілікті желілік басшылар күш біріктіре отырып, тексеру жұмыстарын жүргізу нәтижесінде, мысалы, тек магистральдық желі саласы бойынша 300 мың кемшілік анықталып, соның 48%-ы жедел түрде жойылған.
Магистральдық желінің ең маңызды бөлігі жол дистанциялары бойынша 21158 км басты жолдар, 6559 км станция жолдары, 19687 бағыттама бұрмалары тексерілген.
Бұл ретте 275 668 кемшілік табылып, соның 46%-ы тез арада қалпына келтірілді. Белгі беру және байланыс саласы бойынша 20218 кемшілік белгілі болып, соның 68%-ы жойылды.
Ал электрмен жабдықтау саласында байланыс желісінің 88 ауданы, электрмен жабдықтаудың 86 ауданы және 75 тартым станциясы тексерілді.
Тексеру барысында 3903 кемшілік табылды және соның 67%-ы бойынша қалпына келтіру жұмыстары жүргізілді. Ал қалпына келтіру және өрт сөндіру пойыздарының жағдайына келсек, бұл жағынан 153 ескерту беріліп, барлық олқылықтың орны толтырылған.
Сонымен бірге елдегі бүкіл 240 вокзал ғимаратының, 320 жолаушылар платформасының жағдайы тексеріліп, 249 кемшілік табылған екен. Соның 76%-ы бойынша қателіктер жойылды.
Байқау қорытындыларын магистральдық желі бөлімшелері онлайн режимде шығарып, инфрақұрылым нысандарын күтіп ұстау мен анықталған кемшіліктерді жоюға қатысты шараларды жасап шығарды.