Көлік жөніндегі кеңес отырысы өтті
Маусымның 10 күні Елордада Қазақстан Республикасы Премьер-Министрі Асқар Маминнің төрағалығымен Көлік жөніндегі кеңестің отырысы болып өтті. Онлайн режимде өткен кеңес отырысына «Самұрық-Қазына» ҰӘҚ мен барлық министрлік басшыларымен қатар «Қазақстан темір жолы» ҰК» АҚ басқарма басшысы Сауат Мыңбаев қатысты.
Кеңестің күн тәртібінде теміржол тақырыбына қатысты бірқатар мәселелер көтерілді. Атап айтқанда, отандық өндірістен жолаушы вагондарын шығару, темір жол инфрақұрылымын дамыту, жалпы Қазақстанның транзиттік-көліктік әлеуетін дамыту жөніндегі жобаларды іске асыру мәселелері қаралды.
«Қазақстанның транзиттіккөліктік әлеуетін одан әрі дамыту және оның контейнерлік тасымалдардың жаһандық нарығындағы бәсекеге қабілеттілігін арттыру жөніндегі жұмыстарды жандандыру қажет», – деп атап көрсетті А. Мамин.
Көлік кешеніне қатысты бүгінгі таңдағы өзекті мәселелер, атап айтқанда, түрлі әкімшілік кедергілерді азайту, тарифтік саясатты оңтайландыру, инфрақұрылымды жаңғырту, контейнерлік сервисті арттыру, оның ішінде контейнерлік пойыздардың жылдамдығын арттыру арқылы қазақстандық темір жол транзиттік дәліздерінің бәсекеге қабілеттілігін арттыру бойынша шаралар қабылдау көзделіп отыр.
Айта кетейік, әлемді шарпыған пандемия көліктік қызмет нарығына әсер етпей қойған жоқ, соның ішінде темір жолдағы транзиттік тасымал да айтарлықтай зардап шегіп отыр.
Мысалы, ағымдағы жылдың төрт айында көлік саласының жалпы шығыны шамамен 350 млрд теңгені құрап, көліктің барлық түрлері бойынша жүк тасымалы өткен жылдың сәйкес мерзімімен салыстырғанда 7,1 пайызға кеміген деген мәлімет келтіріледі.
Сонымен қатар, осы кезеңде контейнерлік тасымал өткен жылға қарағанда 29 пайызға өскені де байқалған. Кеңес отырысында Үкімет басшысы А. Мамин, сонымен қатар осы жылға жоспарланған автожол саласындағы ірі инфрақұрылымдық жобаларды да уақытылы әрі сапалы аяқтауды, сондай-ақ автомобиль жолдарына ақы төлеу жүйесін енгізуді жеделдетуді тапсырды.
Сондай-ақ отырысқа қатысушылар қаладағы жолаушылар тасымалын дамыту, ЕАЭО-да көлікте навигациялық пломбаларды пайдалану және т. б. бойынша шаралар кешенін қарастырды.
Дарын МЕДЕТҰЛЫ