Темір станциясы. Қауіпсіздік қамтамасыз етілген
Шымкент қаласы бойынша меншікті тілшісі
Орынбор-Ташкент теміржол магистралінің бойында 1904 жылы салынған Темір станциясы шағын болса да шаруасы қомақты. Іргетасы қаланғалы 116 жыл болған вокзалдан бастап әр ғимарат «мен көненің көзімін» деп тұрған станциядан тәулігіне 50-60 пойыз өтеді.
Бүгінде 4 кезекші, 1 жүк қабылдап-жөнелтуші, 1 тауар кассирі еңбек ететін шағын да болса маңызды станция тек транзиттік пойыздарға ғана қызмет көрсетіп қоймайды, жергілікті жүк тиеуде де, түсіруде де үлкен роль атқарады. Әсіресе, жергілікті халықты көмірмен қамтамасыз етуде маңызы зор.
Айталық, биыл жыл басынан бері ауданға 400 вагондай көмір жеткізіліпті. Ал мемлекеттік мекемелер, яғни мектептерге, балабақша, аурухана, колледждерге бұдан бөлек 100 вагон жеткізіледі.
Егер көмір жетпей қалған жағдайда қосымша тағы да 50 вагондай көмір келмек. Станциядағы тұйық жолға кем дегенде тәулігіне 6-7 вагон келіп жүк түсіріп, тиеліп жатады.
Темір станциясы арқылы жергілікті халық Ташкентке, Тәжікстанға жүгері, бидай артады.
«Енді бір он-он бес күннен кейін бидай тиеу басталады. Бидай біткеннен кейін жүгері артамыз. Одан бөлек, 6-7 вагондай кислота келеді. Көктемгі егіс кезінде 120 вагондай селитра келді. Келген тауарды ауыл шаруашылығымен айналысатын жергілікті диқандар бөліп алды. Ал станциядағы қауіпсіздікке келсек, коронавируске қарсы барлық сақтық шаралары қарастырылған. Теміржолшыларға антисептик, күнделікті маска таратылады», – деді станция басшысы Артық Мыңжанов.
Станция басшысының айтуынша, мұнда жолдар сапалы. Қандай ақау, оқыс жағдай болса да тез арада тексеріліп, жөнделіп, ретке келтіріліп отырады. Әр айдың бірі мен оны аралығында станцияда міндетті түрде айлық өткізіледі. Оған станциядағы барлық теміржолшылар қатысып, кем-кетікті жөндеп, қауіпсіздікті қамтамасыз етеді.
«Темір станциясының айналасы мен арысы Арыс, Түркістан, Сарыағашқа қарай жалғасатын барлық станциялар тікенді сымдармен тартылып, қоршалған.
Сондықтан біздің станцияда мал басу оқиғасы жоқ, пойыздар адам, мал басып кетпейді.
Оның үстіне, станцияның қасындағы Шәуілдір, Балтакөлдің кейбір жолдарында аспалы жолдар салынғандықтан пойыздар жолдың астымен өтеді. Сондықтан, бізде апатты жағдайлар жоқ», – дейді станция басшысы А.Мыңжанов.