Соғыс ардагері - 103 жаста

Қандыағаш жол дистанциясының Ұлы Отан соғысының ардагері Артем Алексеевич Проскурня 103 жасқа толды. Көп жасаған қарияны әріптестері туған күнімен құттықтап барды.

Артем Алексеевич теміржол көлігіндегі еңбек жолын соғыстан келген соң, яғни 1945 жылы бастады. Ол жол дистанциясында жол монтері болып жұмыс істеп, сол кездегі қызығынан қиындығы мол кәсіпті 32 жыл абыроймен атқарды. Ал 1977 жылы көп жылғы бейнетінің зейнетін көруге құрметті демалысқа шықты.

Қарт жауынгердің кеудесінде «Москваны қорғағаны үшін», «Кеңес Одағының Маршалы Г.К.Жуков», «1941-1945 жылдары Ұлы Отан соғысында Германияны жеңгені үшін», «Еңбек ардагері» сынды соғыста және еңбек майданында алған марапаттары, басқа да мерекелік медальдар жарқырайды.

Жүзден асқан соғыс ардагерін Қандыағаш жол дистанциясының бастауыш кәсіподақ ұйымының төрағасы Қалыбек Шарипов, қала әкімінің орынбасары Жандос Көлбаев, тораптық ардагер кеңесінің төрағасы Кенжебай Майсутов, жол дистанциясының жетекші инженері Сания Білімова бар бір топ азамат атаулы датасымен құттықтап барып, Ұлы Отан соғысындағы Жеңістің 75 жылдығы мерекелік медалін кеудесіне тағып, 135 000 теңге мөлшерінде ақшалай сыйлық табыс етті.

Әріптестері қарияға елде болып жатқан коронавирус пандемиясына байланысты Ұлы Жеңіс мерекесімен құттықтауға енді мүмкіндік туғанын жеткізіп, Артем Проскурняға денсаулық, ұзақ ғұмыр тіледі. Қарт жауынгер арнайы келіп құттықтағандарға зор алғысын білдіріп, еңбекте табыс тіледі.