Қалыпты нормадан аспаған
Шымкент қаласы бойынша меншікті тілшісі
Көлік тасымалы – ел эконмикасын дамытудың маңызды тетіктерінің бірі. Алайда, оның қоршаған ортаға тигізетін зияны да жоқ емес. Дегенмен елімізде табиғатты қорғай отырып, теміржол саласын жандандыру қатар жүргізіліп келеді.
Шымкент магистральдық желі бөлімшесі НЖС-9 берген мәліметке сүйенсек, алғашқы жартыжылдықтың қорытындысы бойынша табиғатты қорғауға бағытталған жұмыстар мен қаржы 100 пайыз игеріліпті. Атмосфераға жіберілген лас қалдықтар жоспар бойынша 33,9137 тонна болса, жіберілгені 21,9137 құрады. Бұл қалыпты нормадан аспағанын білдіреді. Ал ластайтын сұйық заттарды төгу жоспар бойынша 0,315 тонна болса, орындалғаны 0,246 тоннаны құрап, көрсетілген норманың шегінен аспады.
Бөлімше бойынша КТСМ құрылғысының жұмысы өткен жылғымен салыстырғанда өнімділігі артқан. Биыл аталған құрылғы арқылы бақылауға алынған 126771 пойыздың саны 4 бірлікке ғана азайыпты. Ал тоқтатылған пойыздың саны өткен жылғымен салыстырғанда керісінше 29 бірлікке көбейген. Пойыздардың тоқтап қалуы – 16 сағат 23 минутты құрап, өткен жылғымен салыстырғанда 11 сағат 43 минутқа артық шықты.
Теміржолшылар ШЧ-37, ШЧ-38 дистанцияларындағы КТСМ құрылғысының жұмысын жақсарту үшін барлық шараларды қолға алды. Атап айтқанда, КТСМ учаскесінің айналасындағы жерді тегістеп, ревизия жүргізді. COVID-19 байланысты жарияланған карантиннің ережелері мен нормаларын сақтай отырып, ВЧДЭ30 және станция жұмысшыларының қатысуымен техникалық жаттығулар өткізілді.