Шетелден бір вагон гуманитарлық жүк жетті
Түбек теміржолымен Маңғыстау облысына шетелден COVID-19 пандемиясымен күреске арналған бір вагон медициналық гуманитарлық жүк жетті. Шетелдік жүк тиелген вагон Маңғыстау станциясында қабылданып, қажет қызметтер көрсетілді.
Вагон станция тұйығына ағытылып, сол жерден қажет жеріне жүктелді. Онда жалпы көлемі 3,5 тоннаны құрайтын медициналық бұйымдар бар. Атап айтқанда, 500 мың медициналық бетперде, 40 мың көпфункционалды дезинфекциялық құралдар, 144 термометр және т.б.
Облыстық әкімдіктің баспасөз қызметі таратқан ақпаратқа сүйенсек, бұл жүктер өңірдің Ақтау, Жаңаөзен қалалары мен Бейнеу, Түпқараған, Мұнайлы және Қарақия аудандарының медициналық мекемелеріне үлестірілмек.
Маңғыстаудағы індетпен күреске арналған мұндай көмекке ACE GROUP трансұлттық компаниясының инвесторлары мұрындық болды. Аталған компания елімізде жалпы құны шамамен $200 млн болатын логистика саласындағы ірі жобаны жүзеге асыруды жоспарлап отыр. Инвестициялық жоба Шығыс Азиядан Каспий маңы аймағына өнім жеткізудің тиімді тізбегін дамытуды көздейді.
− Медициналық гуманитарлық көмек жүгі тиелген вагонды Қытай елінің Ляньюнгань портынан JIANSU ACE ALLOY CO LTD компаниясы жөнелткен. Қазақстанның Алтынкөл станциясы арқылы экспортталған. Бізге №2104 пойызымен №60993946 вагоны, ТGHV 4407898 40 тонналық контейнермен келді. Жіберуші тарап Қытай болса, қабылдаушы тарап Маңғыстау облыстық денсаулық сақтау басқармасы деп көрсетілген, – дейді бұл туралы Маңғыстау станциясы бастығының орынбасары Ақсұлу Бейсенова.