Маңғыстау-Бейнеу бағытында жолаушылар пойызының қозғалысы қайта жанданды
Бірінші қыркүйектен бастап Маңғыстау-Бейнеу-Маңғыстау бағытында жолаушылар пойызының қозғалысы қайта жанданды. Карантинге байланысты наурыз айында уақытша тоқтатылған осы бағдар бойынша 657/658 пойызы Маңғыстау облысы Бас мемлекеттік санитарлық дәрігерінің Қаулысына сәйкес күн сайын қатынайтын болады.
404 километрді құрайтын бұл аралықта жолаушылар пойызы жолай 19 бекетке аялдама жасап, 9 сағаттай жол жүретін болады. Пойызда жалпы саны 7 вагон болмақ. Соның ішінде 5 плацкарт, 1 купе және бір қызметтік вагон. Плацкартта 52 орынға билет сатылатын болса, купе – 36 орын. Ал купе типтегі қызметтік вагон «штабтық» орын саналғанымен, ондағы 30 орын жолаушыларға арналады. Соның ішінде, мүгедек адамдарға да орын қарастырылған.
Пойыз жүріп бастаған алғашқы күні онда 86 жолаушы болған екен. Жолаушылар теміржол қатынасының қайта жанданғанына қатты қуанып отыр.
«Бүгін таңғы сағат 08:10-да жолаушылар пойызы аман-есен Бейнеу станциясына келіп жетті. Пойызда 86 адам болды. Енді бүгін кешкі сағат 21:50-де кейін қарай қайтпақ. Оған 200 билет сатылған екен. Бұл халықтың жол қатынасының қайта ашылғандығы туралы құлақтана бастағанын білдіреді. Ол пойыз Маңғыстау станциясына таңғы сағат 07:40-та келмек, – дейді бөлімше бастығының орынбасары Ерлан Бүркітов.