Контейнерлік тасымалда өсім бар
Шымкент қаласы бойынша меншікті тілшісі
Бүгінде бүкіл әлем сенімді, тиімді және ыңғайлы контейнерлік тасымалға ден қойып отырғаны белгілі. Қазақстан темір жолы да бұл үрдістен тыс қалмақ емес, ел ішінде ұйымдастырылып жатқан контейнерлік пойыздардан бөлек, контейнер транзиті де қарқын алған.
Шымкент жүк тасымалы бөлімшесі бойынша контейнерлік транзиттік пойыздарды өткізуді жоғары деңгейде қамтамасыз етіп отыр. Жалпы, контейнерлік пойызда өсім бар, биылғы жылдың 9 айында Шымкент бөлімшесі арқылы 2587 контейнерлік маршрут өткен. Айталық, Түлкібас станциясы бойынша 953 контейнерлік пойыз жөнелтіліп, 1634 пойыз қабылданған. Түркістан станциясы бойынша 625 пойыз қабылданып, 841 контейнерлік пойыз жөнелтілген. Сарыағаш станциясынан 328 пойыз қабылданып, 999 контейнер пойыз жөнелтілген.
Жыл басынан бері тоғыз айдағы контейнерлік пойыздардың транзиттік бағыттағы қозғалыс жылдамдығы жоспар бойынша тәулігіне 938 км болса, нақты орындалғаны 920 км/тәулік.
Басқалай атқарылған жұмыстармен қоса есептегенде 98% құрады. Ал Қытай-Еуропа-Қытай бағытындағы жоспар бойынша 1055 км/тәулік бекітілген, іс жүзінде орындалғаны тәулігіне 1125 км, яғни 106% құраған.