Пойыз бағыттары қысқарды
«Қазақстан теміржолшысы» газетінің тілшісі
Ел аумағында коронавирус инфекциясының таралуын болдырмау жөніндегі ведомствоаралық комиссияның шешіміне сәйкес Шығыс Қазақстан облысындағы бірқатар бағыттағы жолаушылар пойызының бағдарлары қысқартылды.
Бұл туралы «Жолаушылар тасымалы» АҚ баспасөз қызметі мәлімдеп, жолаушылар пойыздарының қозғалыс кестесіне бірқатар өзгерістер енгізілгенін хабарлады. Атап айтқанда, қарашаның 2-нен бастап «Павлодар-Алматы-2» бағытындағы пойыздың Дегелең, Семей, Жаңа-Семей, Шар, Жаңғызтөбе, Жарма, Үшбиік, Аягөз, Ақтоғай станцияларында жолаушыларды отырғызуға және түсіруге тыйым салынады. «Алматы-2-Өскемен-1» пойызы бұрынғыдай күн сайын емес, күнара жүретін болады. Сонымен қатар «Нұр-Сұлтан-Нұрлы Жол-Өскемен-1» пойызы күн сайын емес, аптасына бір рет қатынайды. Шығыс Қазақстан облысының барлық станцияларынан түсетін жолаушыларда тапсырылғанына 3 күннен аспаған COVID-19 инфекциясын жұқтырмағандығын растайтын сынама нәтижесі болуы керек. Осыған дейін пойыз билетін сатып алғандар ақшаларын қайтара алады.
Жолаушылар пойыздарының жүру кестесі туралы барлық ақпаратты «105» нөмірі бойынша біле алады.
Қоғам басшылығы тұрғындарды коронавирус пандемиясы кезінде дерттің таралуының алдын алу мақсатында қабылданған шараларға түсіністікпен қарауға шақырады.