Екі мың теміржолшы екпе алды

«ҚТЖ-Жүк тасымалы» ЖШС Шымкент бөлімшесі филиалының директоры А.Арысбаевтың төрағалығымен жұмыскерлерді вакциналау бойынша штаб құрылды. Қазіргі таңда көпшілік екпенің пайдасын түсініп, өз еріктерімен емханаларға барып кезекке тұруда. Айталық, Шымкент қаласы бойынша бүгінгі таңға дейін 175270 адам екпе алса, оның ішінде 85 233 екінші компонентін толық алып үлгерді. Ал Түркістан облысы бойынша 206 376 адам екпенің 1-ші компонентін қабылдады. Шымкент жүк тасымалы бойынша құрылған штабқа «Қазтеміртранс» АҚ Шымкент филиалы, «ӘТЖҚ» ЖШС Түркістан филиалы,  Кедентранссервис» АҚ Шымкент аймақтық филиалы және «Shymkent Medical Services» ЖШС мүше болып кірді. Аталған штаб жұмысшылар мен олардың отбасы мүшелерінің екпе алуын, жұмысшыларға оның маңыздылығын түсіндіру мақсатында ақпараттық жұмыстарды күшейтуді, «Медикер» ЖШС аймақтық өкілдігімен немесе өңірлік денсаулық сақтау басқармаларымен бірлесіп, жұмысшыларды екпеден  өткізетін пункттер ұйымдастыруды қамтамасыз етуді мойнына алды. Шымкент магистральдық желі бөлімшесі кадр бөлімінің бастығы Б.Назарованың айтуынша, COVID-19-ға қарсы екпе алған әрбір жұмысшыға 20 жұмыс күні ішінде әр компонентті алғаннан кейін екпе пунктінен алып келген мөр басылған анықтамасы бойынша бір күн жұмыстан босатылады  және жалақысынан ұсталмайды. Қазір екпе алам деген халықта таңдау көбейді, яғни Спутник V, HayatVax, QazVac. Келушілер қайсысын салдырам десе де өз еркі. Осы тұста бір айта  кететін жайт, тұмау, фарингит, қан қысымы сияқты т.б. аурулар болғанымен, жазылған соң қайтадан келіп вакцина алуына болады дейді дәрігерлер. «Қазір бізде Hayat-Vax вакцинасы салынып жатыр, ол екі этаптан тұрады. Мұнда келген теміржолшылар көбіне қай түрі жақсы, қайсысын салдырғанымыз дұрыс, екпеден кейін қандай жағымсыз әсері болады деп сұрайды. Келген теміржолшыларға бәрін айтып түсіндіріп жатырмыз.  Барлық вакциналар екі компонентті. Айырмашылығы екі компоненттің салыну арақашықтығында. Бастапқыда Спутник V-дің 2-ші компоненті 21 күннен кейін салынатын, қосымша зерттеуден соң интервалды 21-ден 45, 90 күнге дейін ұзарту ұсынылды. Ол вакцинаның сапасына еш әсер етпейді. Ал, араб вакцинасының интервалы 2-4 аптаны құрайды. Яғни екінші компонентті 14 немесе 21 күннен кейін салдыруға болады. Ал, QazVac 21 күннен  кейін егіледі», – деді «Shymkent Medical Services» ЖШС бас медбикесі Гүлбахар Сұлтанқызы. Қазіргі таңда жұмысшылар мен олардың отбасыларын көбірек тарту мақсатында COVID-19 қарсы вакциналау штабы жақсы жұмыс жасап жатыр. Барлық бөлімшелерде халықты жаппай вакциналау туралы буклеттер таратылды. Сонымен қатар, емхана немесе Медикер орталығына тіркелмеген  болса да жергілікті азаматтар барып вакцина алуына болатын жағдай жасалып қойған. Бүгінге дейін аймақта 2 мыңнан астам теміржолшы коронавируске қарсы екпе алды.