Маңғыстауға 100 вагонға жуық жем-шөп жеткізілді
Шымкент қаласы бойынша меншікті тілшісі
«Қазақстан темір жолы» ҰК» АҚ және Түркістан облысы әкімдігінің қолдауымен 95 вагон, яғни 3 мың тоннаға жуық шөп Маңғыстау облысына жөнелтілді. Бүгінде Маңғыстау облысының шаруаларына Түркістан облысы әкімдігі ерікті жастардың, кәсіпкерлердің, жанашыр тұрғындардың ұйымдастыруымен мал азығы тапшылығы орын алған аумақтарға көмек қолын созуда. Арыс станциясынан – 17 вагон, Сарыағаш станциясынан – 51 вагон, Шымкент станциясынан – 18 вагон, Бадамнан – 4 вагон, Отырар ауданынан 5 вагон шөп тиеліп жөнелтілген. Облыстық ауыл шаруашылығы басқармасының мәліметінше, биылғы қуаңшылық батыс өңірлерімен қатар, Түркістан облысының Келес, Сарыағаш аудандарының жыл сайын табиғи шөп оратын алқаптарына да әсер етіп, табиғи шөп бітік шықпады. Алдағы қыс айларында мал азығының тапшылығын алдын алу мақсатында облыстағы орман қорының жерлерінен табиғи шөптерді орып алу ұйымдастырылуда. Сонымен қатар Келес, Сарыағаш, Жетісай, Мақтарал аудандары Шардара, Отырар аудандарының жайылымдарын пайдалану туралы меморандум жасалынған.