Арыстағы өрттен кейін мамандар сары фосфордың ауаға жайылу қаупін зерттеп жатыр
Шымкент қаласы бойынша меншікті тілшісі
Өткен аптада күтпеген жерден Арыс станциясында өрт шықты. Фосфор тиелген контейнерден тұтанған өрт қала халқын әжептеуір әбігерге түсіріп, қайсы бір жылғы алапат өрттен зәрезап болып қалған тұрғындарды тәп-тәуір дүрліктірді. Оқиғаны тарқатып айтар болсақ, 6 тамыз күні сағат 16.25 минутта Арыс теміржол вокзалында жүк пойызының контейнерінен өрт шыққаны туралы хабарлама келіп түседі. 2 контейнер вагонға тиелген «сары фосфор» болған. Аталған пойыз Жамбыл облысынан шығып Ресейге бет алған. Жалпы, жүк пойызының құрамында 64 вагон болған. Өрт №54 вагоннан шыққан. Тауарды фосфордың отаны саналатын Жамбыл облысындағы «Казфасфат» ЖШС жөнелткен. Алушы – Ресейдің «КТСП» ЖАҚ. Өрт шыққан вагондар дереу пойыздан ажыратылып, қауіпсіз жерге қойылды. Оқиғадан пойыз құрамындағы басқа вагондар зиян шеккен жоқ. Төтенше жағдайға алдымен «ҚТЖ» ҰК» АҚ 12 қызметкері мен 1 бірлік техника мен Өрт сөндіру пойызы, ЖПБ 20 қызметкері мен 1 техника бірлігі, ҚР Қорғаныс министрлігінің 44859 әскери бөлімінен 8 әскери қызметші және 2 бірлік техникасы, Арыс аудандық санитарлық-эпидемиологиялық бақылау бөлімінен 3 қызметкер және 1 бірлік техника тартылды. Ал жалпы өрт сөндіруге 291 адам, 42 техника және өрт сөндіру пойызы жұмылдырылды. Өрт 21.55-те толықтай сөндірілді. Жергілікті әкімдік тарапынан станцияға жақын орналасқан «Наурыз» мөлтек ауданынан 1700 адам эвакуацияланды. Оның ішінде 1050 адам туыстарының үйіне жайғасса, 650 адам уақытша ашылған 4 эвакуациялық пунктке, яғни мектептің ғимаратына орналастырылды. Оқиғаға байланысты Түркістан облысы ТЖД жедел желіні іске қосты. Оқиға орнында құрылған жедел штабта облыс әкімінің орынбасары Сәкен Қалқаманов, облыстық ТЖД бастығы Н. Жүнісов, облыстық Полиция департаментінің бастығы А.Сейдуалиев, Арыс қаласының әкімі Г.Құрманбекова, Арыс қаласы бойынша ТЖ комиссиясы мен авариялық қызмет өкілдері жұмыс істеп, оқиғаның жай-жапсарын тексеруге кірісті. Санитарлық-эпидемиологиялық қызмет тарапынан өрт сөндірілгеннен кейін ауа сынамасы алынды. Полиция департаменті өрт болған пойыз аумағы мен елді мекен маңын қоршап, 6 блок-бекет қойды.