Жолаушылар вагоны қысқа тастүйін дайын

«Вагонсервис» АҚ-ның Батыс филиалы 447 жолаушылар вагонына техникалық қызмет түрлерін көрсетіп, алдағы қыс маусымына тастүйін дайындады.

Ұлттық компания құрамындағы «Вагонсервис» АҚ-ның Батыс филиалы – үлкен ұжымдардың бірі. Ақтөбе, Орал, Қызылорда, Маңғыстау, Атырау секілді үлкен өңірлердегі телімдер осы жерден басқарылады. Яғни ауқымды жұмыс көлемі де осында. Қозғалыс қауіпсіздігі қатаң сақталған. Жолаушылар пойыздарындағы вагондар осы жерде жабдықталады. Мекеме жолаушылар вагонының таза болып, жарық пен су, жылу жүйесінің үздіксіз жұмыс істеуін қамтамасыз етіп отыр.  

«Вагонсервис» АҚ жолаушылар вагондарын жөндеу жөніндегі батыс филиалының директоры Асхат Маратовтың айтуынша, вагондарға жөндеу жұмыстары жоспар бойынша уақытылы жүргізілген. Техникалық қызмет көрсетудің 1-ші талабы бойынша филиалдағы Қытай, Украина және Ресей өндірісінен шыққан жалпы саны 652 вагонға күнделікті бақылау, тексеру жұмыстары өткізіледі. Қазіргі уақытта қысқы тасымалдау алдындағы жоспарлы жөндеу жұмыстары аяқталған.  

«Техникалық қызмет көрсету-2» талабы бойынша да жұмыстар толығымен аяқталды. Жоспар бойынша қысқы тасымалдау алдында 254 вагон тексерістен өтті. Жылу жүйелері қаралып, тексерілді. «Техникалық қызмет көрсету-3» талабы бойынша 193 вагон дайындалды. Вагон ішін жолаушыларға жайлы әрі эстетикалық тұрғыдан тартымды ету жұмыстары жүргізілді», – дейді батыс филиалының директоры Асхат Маратұлы.  

Оның айтуынша, «Техникалық қызмет көрсету-2» талабы бойынша вагондар жылына екі рет сервистік қызметтен өтеді екен. Бірі көктемгі комиссиялық байқауда, екіншісі күзгі байқауда. Батыс филиалы бойынша мыңға жуық қызметкер жолаушылар вагондарының таза әрі қажетті дүниелермен жарақтандырылуына қызмет етеді. Әсіресе, тексеріс барысында қауіпсіздік пен сапалы қызметке баса көңіл бөлініп, тежегіш жүйесі, қосалқы дөңгелек, автотежегіштің жұмыс істеуі қатаң бақылауға алынған.