ҚТЖ жазғы маусымда өзінің барлық бағдарлары бойынша 4,2 млн-нан астам жолаушыны тасымалдауға дайын

Қазақстанда ішкі туризм үшін ең басты көлік түрі – пойыздар болып қалып отыр. Жаз маусымы басталғалы бері Бурабай курорты станциясына дейін 47,8 мыңнан, Алакөлге дейін 32,5 мыңнан астам адам тасымалданған. Осы екі бағыт бойынша барлығы 80,4 мыңнан астам жолаушыға қызмет көрсетілген, деп хабарлайды Rail-news.kz. 

Алакөлге жалпы 280 мыңға жуық жолаушыны тасымалдау жоспарланып отыр, бұл өткен жылға қарағанда 16 мың адамға көп. Бұл бағыттағы вагондар 100% толып кетіп отыр.

Жазда «Жолаушылар тасымалы» АҚ 112 бағдар бойынша 4,2 млн-ға дейін жолаушыны тасымалмен қамтамасыз етпек.Сол үшін Алакөл, Балқаш, Бурабай курорты сияқты негізгі курорттық бағыттарды қамтитын қосымша пойыздар саны арттырылды. 

Қозғалыс кестесіне 11 пойыз бен тіркеме вагондар қосылды, олардың қатынау мерзімділігі әр түрлі, яғни күн сайын жүретіні де бар, аптасына бірнеше рет қатынайтыны да бар. Әсіресе, Астана мен Алматыдан Достық, Жалаңашкөл, Шымкент және басқа да туристік аймақтарға бағытталған бағдарлар жоғары сұраныста. 

Жолаушыларға қолайлы болуы үшін Жалаңашкөл және Көктума вокзалдарында персоналдың жұмыс кестесі өзгермелі етіп енгізілді. Ақши станциясының вокзалы тәулік бойы жұмыс істейтін режимге ауыстырылды. Санитарлық аймақтар, күту залдары мен басқа да тиесілі инфрақұрылым жаңартылды. Станцияларда дауыс зорайтқыш байланыс жүйесі мен билет кассалары жұмыс істеп тұр.