Маңғыстау – Ақтөбе: жаңа вагондар жолға шықты
Маңғыстау облысы бойынша меншікті тілші
Маңғыстау халқы жаңажылдық мерекеге орай жолаушылар игілігіне берілген отандық өндірістен шыққан су жаңа вагондарды мәре-сәре болып қарсы алды. Сапар алдында олардың лентасын кесуге теміржол мекемелері басшылары мен ардагерлер, жергілікті тұрғындар жиналды.
«Маңғыстау-Ақтөбе» бағытына жаңадан 4 купе, 5 плацкарт вагоны қосылды. Жаңа жыл мерекесі күндері алғашқы жолсапарын бастаған жаңа вагондар – қазақстандық «Тұлпар-Тальго» және «Зиксто» зауыттарынан шыққан стандартты вагондар. Онда жолаушыларға сапалы қызмет көрсету мақсатында қажетті қолайлылықтар қарастырылған. Салқындату және жылу жүйелері, экологиялық таза дәретханалар, әр орынға орнатылған 220 вольтты тоқ жүйесі және микротолқынды пештер, сенсорлы су бергіш диспенсер, тоңазытқыш, бейнебақылау құрылғысы, жуыну бөлмесі, мүмкіндігі шектеулі азаматтарға арналған амбулифт орнатылған вагондар бар.
– Жолаушыларға көрсетілетін қызметті жақсарту мақсатында «Батыс» аймақтық жолаушылар тасымалының құрамдары жыл сайын жаңарып, жаңа вагондар қосылып жатыр. Мәселен, 2025 жылы 31 жаңа вагон қабылданды. Міне, бүгін, бұрын халық шағымданатын Маңғыстау – Ақтөбе бағытында да оң өзгерістер болып жатыр. Қазір бұл бағытта негізгі құрамда 11 вагон бар. Қажет болған жағдайда сұранысқа байланысты тағы да қосымша вагондар тіркелетін болады. Жолаушыларға барынша қолайлы жағдай жасап, жолсапар барысында қауіпсіз әрі ыңғайлы мүмкіндіктер сыйлау – біздің басты мақсатымыз. Бүгін сол міндетіміздің бір бөлігі орындалып, халықтың жаңа жылда жаңа вагонмен жүруі ұйымдастырылып отыр, – дейді Батыс аймақтық жолаушылар тасымалының Маңғыстау учаскесі бастығының міндетін атқарушы Мырзабек Сүйінғарин.
