Қауіпсіздік статистикасы: төрт жылда 2,3 мың малды пойыз қаққан
«Қазақстан теміржолшысы» газетінің тілшісі
Статистикалық мəліметтерге сəйкес, өткен 4 жыл ішінде 322 адамды жəне 2,3 мың малды пойыз қаққан.
Оқиға салдарынан 187 адам қаза тауып, 135-і əртүрлі дəрежеде жарақат алған. 31 адам суицид жасаса, 30 адам ішімдіктің салдарынан қайғылы жағдайға ұшыраған.
– Адамдардың теміржолда белгіленбеген жерлерден өтуі жəне төрт түліктің қараусыз жайылуы келеңсіз оқиғалардың негізгі себептері болып отыр. 2019-2021 жылдар аралығында жəне осы жылдың 8 айында теміржол көлігінде қауіпсіздік қағидаларын бұзғаны үшін Әкімшілік құқық бұзушылық туралы кодекстің 559-бабы бойынша жеке жəне заңды тұлғаларға қатысты 854 əкімшілік іс қозғалды, – деді Мәжіліс депутаттарының сауалына жауап берген ҚР Бас прокуроры Берік Асылов.
Айтуынша, биылғы жылы Көлік комитетінің аумақтық бөлімшелері магистральдық теміржол желісінің 8 объектісін тексерген. Сонымен қатар Ішкі істер министрлігі Индустрия жəне инфрақұрылымдық даму министрлігімен жəне ҚТЖ-мен бірлесіп, теміржол бойындағы қоршауларға 1 022 тексеру жүргізген. Оның қорытындысы бойынша ҚТЖ-ға 832 ұсыныс енгізіліп, Әкімшілік құқық бұзушылық туралы кодекстің 479-бабымен 59 лауазымды тұлға əкімшілік жауапкершілікке тартылған.