Теміржолдағы ережені әрбір тұрғын жатқа білуі қажет
Маңғыстау облысы бойынша меншікті тілші
«Теміржол – қауіпті аймақ» тақырыбындағы түсінік жұмыстары жалғасуда. Өткен аптада Сай-Өтес станциясында теміржол бойындағы қауіпсіздікке қатысты кезекті профилактикалық іс-шара өтті.
Сай-Өтес ауылында орналасқан «Өтес» жалпы білім беру орта мектебінің оқушыларымен өткен кездесуде станциядағы желілік полиция бөлімінің, аудандық әкімшілік полиция мен ювеналды полиция бөлімдерінің инспекторлары дәріс оқып, теміржол аумағында жүру қағидалары мен теміржол белгілері туралы әңгімелеп, ережені ескермеудің салдары жайында түрлі мысалдар келтіріп, айғақтарды алға тартты.
– Мектептерді аралап, оқушылармен жиі кездесу өткіземіз. Оларға қауіпті факторларды ескерте отырып, теміржол бойында сақтық шараларын сақтауды ескерту ғана емес, үйрету де біздің мақсатымыз. Темір жолда жүріп-тұру ережесін бала кезден құлағына құйып өскен оны жадында ұстап, дағдылануы керек. Өткелдерде жол белгілерінің, бағдаршамның, шлагбаумның орналасуын және өткел кезекшінің нұсқауын ескеру сияқты жүріс-тұрыс қағидаларын теміржолға жақын елдің әрбір тұрғыны жатқа білуі қажет деп санаймыз, – дейді Сай-Өтес станциясындағы желілік полиция бөлімінің басшысы Нұрлыбек Рахметов.
