«Назар аудар, өткел!»: Маңғыстауда жол қауіпсіздігіне арналған айлық өтті
Маңғыстау облысы бойынша меншікті тілші
Түбекте 5 мамыр мен 5 маусым аралығында өтіп жатқан «Назар аудар, өткел!» айлығына орай Маңғыстау жол дистанциясы профилактикалық, рейдтік іс-шараларды ұйымдастыруда.
Жол дистанциясы 34 теміржол өткелінде қауіпсіздікті қамтамасыз етіп отыр. Жолшылар мамыр айының 20-күні Жаңаөзенде, 21-күні Қарақияда, 22 мамырда Мұнайлыда, 23 мамырда Маңғыстау ауданы бойынша теміржол өткелдерінде болып, автокөлік жүргізушілерімен кездесті. Олар айлықтың маңызы туралы ақпарат беріп, автокөлік иелеріне өткелден өту ережелерін түсіндірді.
– Теміржол өткелінен өтерде сақ болу керектігі – қашанда өзектілігін жоймайтын ескерту. Сондықтан көлігі бар жандардан қауіпсіздік шараларын сақтауды, жолда бара жатқанда пойыздан бұрын өтемін деп «таласпауды» сұраймыз. Өткелде тиісті жүру ережелеріне бағынбау өзінің ғана емес, қаншама адамның өміріне қауіпті. Оның дәлелі – елімізде болып жатқан жол-көлік оқиғалары, – деген Маңғыстау жол дистанциясының жетекші инженері Мұхтар Кульчанбаев мамыр айында өткелдерде көктемгі жылдық тексерулер болғанын жеткізді. Облыстық полиция департаментімен бірге атқарған бұл іс-шара барысында Маңғыстау – Сайөтес, Маңғыстау – Болашақ аралығындағы теміржол өткелдерінің бәрі түгел тексерілген. Табылған кемшіліктерді полиция департаменті ішкі істер министрлігіне жолдап, қажетті жұмыстар жасалады дейді.