Өрт сөндіру пойызы тосын жайтқа толықтай даяр
Абай облысы бойынша меншікті тілші
Семей станциясындағы №24 өрт сөндіру пойызына кезекті дабыл келіп түсті. Семей – Локоть телімі бойындағы Дүйсекен станциясындағы жолшылар қосынынан өрт шыққан. Таяқ тастам жерде сыңсыған қарағайлы орман, іргелес теміржолшылар үй-жайы тұр. Алапат апатқа айналмай тұрғанда тілсіз жауды жылдам түрде ауыздықтау қажет. Қызыл жалын жалаң қолмен күресіп жатқан жолшыларға бой берер емес.
Дем сәтте келіп жеткен өрт сөндіру пойызының қызметкерлері ширақ қимылмен іске кірісті. Өрт шыққан ПЧ-39 мекемесінің №3 өндірістік учаскесінің 10-шы линия бөлімшесі желі бойына таяу орналасқан.
Өрт ошағы шағын, жолшылардың демалыс бөлмесінен шығыпты. Өрт сөндірушілер бір оқпанмен ғана жедел қимылдап, қызыл жалынды жылдам сөндірді. «Апат» аумағы 5 шаршы метр ғана жерді қамтиды. Әйтсе де, одан төнер қауіп орасан. Семей станциясындағы өрт сөндіру пойызының жігіттері осыдан екі жыл бұрынғы 15 орманшыны ажал құштырған үлкен өртті сөндіруге қатысқандарын әлі де ұмытқан жоқ. Орын алуы мүмкін барлық тосын жайтқа мейлінше даяр болу қажет.
Абыройы сол, бүгінгі оқиға өрт-тактикалық оқу жаттығу іс-шарасы болатын. Ал шартты түрдегі оқиға сценарийі жоғарыдағыдай.
Осылайша «ҚТЖ» ҰК» АҚ бас инженері Р.Садырқұловтың ЦРПБ/44-И номерлі өндірістік қауіпсіздік бойынша жоспарлы іс-шарасы аясында семейлік өрт сөндіру пойызының қызметкерлері кәсіби шеберліктерін шыңдады.
– Бүгінгі өткізілген оқу-жаттығуға өрт сөндіру пойызының он сарбазы қатысты. Вахталық жұмысшылар қосынынан шыққан шартты түрдегі өрт жылдам оқшауланды. Берілген жауынгерлік тапсырма толық көлемде орындалды. Өрт сөндірушілер әрекеті жоғары деңгейде деп бағалануда. Кез келген тосын жайтқа тас-түйін даярмыз, – дейді Семей станциясындағы Өрт сөндіру пойызы бастығының міндетін атқарушы Тілеуғабыл Бисенғазинов.
Айта кетерлігі сол, қазіргі уақытта Семей ЖТ бөлімшесі бойынша кең көлемде өрт қауіпсіздігі айлығы да өткізіліп жатыр. Бұл ретте семейлік өрт сөндіру пойызының сарбаздары кез келген апаттың алдын алуға әрдайым әзір екендіктерін тағы бір мәрте толық дәлелдеді.
