Абайлаңыз, балалар!

Маңғыстау станциясындағы желілік полиция қызметкерлері 25 тамыз-10 қыркүйек аралығында «Абайлаңыз, балалар!» атты акция өткізуде.

Үйымдастырушылардың айтуынша, аталған акцияның негізгі мақсаты – жасөспірімдердің теміржол бойында және пойыздарда жүруі кезінде қауіпсіздік шараларын сақтау мәдениетін қалыптастыру, олардың өмірі мен денсаулығын қорғау. Акция барысында теміржол көлігінде жасөспірімдердің қауіпсіздігін қамтамасыз етуге бағытталған түсіндіру жұмыстарын жүргізіп, балалар мен ата-аналарға теміржол аумағында жүріптұру ережелері көрсетілген үнпарақтар таратылуда.  

– Міне, жаңа оқу жылы да басталды. Оқушылар мектепке барып, үйге қайтар жолда теміржол аумағынан да жүруі немесе сол маңда ойнап кетуі мүмкін. Сондықтан балалардың қауіпсіздігі үшін арнайы алдын алу жұмыстарын жүргізудеміз. Алғашқы күндері вокзал аумағында пойыздағы жолаушылармен өткізсек, алдағы күндері Маңғыстау станциясындағы №1, 5, 11 орта мектептердің 7, 8 сыныптарына кездесу ұйымдастырамыз. Оларға теміржол аумағында жүру қағидаларын түсіндіріп, арнайы ережелерді ескертеміз, – дейді Маңғыстау ст. ЖПб ӘПб полиция майоры Нарбек Жөнелбаев.