Жыл басынан бері темір жол бойында 26 адам қаза тапқан
Ақтөбе облысы бойынша меншікті тілші
«Теміржол қауіпті аймақ!» деп дабыл қаққан ақтөбелік теміржолшылар елімізде адамдардың қатысуымен 40-тан аса оқыс оқиға тіркелгенін айтып отыр. Осыған орай Ақтөбе станциясында қауіпсіздік акциясы өтті.
Жедел профилактикалық іс-шара өткелде рейд жүргізуден басталып, әрі қарай темір жол колледжіндегі студенттер кездесуімен жалғасты. Рейдке Ақтөбе станциясының басшылығы, локомотив пайдалану депосының бас инженері, жол дистанциясы мен тәртіп сақшылары шығып, ел азаматтарына жол қоғалысы ережелерін сақтауды қаперге салды.
Ақтөбе станциясының басшысы Нұрлан Ермағамбетов, жыл басынан бері елімізде адамдардың қатысуымен темір жол бойында 45 оқыс оқиға болып, соның салдарынан 26 адам қаза тапқанын атап өтті. Қайғылы жағдайлар Қазақстан темір жолының 15 бөлімшесінде тіркеліпті.
Рейд кезінде теміржолшылар өткелді кесіп өтпек болған жолаушыларды тоқтатып, түсіндіру жұмыстарын жүргізіп, қауіпсіздік сақтауды ескертетін ережелер жазылған парақшалар таратты. Ал ақтөбелік теміржолшылардың дені теориялық білім алатын колледждегі кездесу барысында студенттер қауіпсіздік акциясына қатысты мәселелерден бөлек, оқуды бітіргеннен кейін жұмысқа орналасу, бос ваканциялар туралы өздерін қызықтырған сұрақтарды қойып, оған жауап та алды.
«Қазір пойыз саны көбейіп жатыр. Қандыағаш, Хромтау, Ақтөбе станцияларында көбірек пойыз өткізу іс-шаралары қабылданды. Бұл дегенің жаңа жұмыс орындары ашылады деген сөз. Сондықтан теміржолшылар үшін мүмкіндіктер көп. Сіздер қазірден теориялық білімге ден қойыңыздар. Бұл салада ең басты талап – жауапкершілік. Ал ол тәртіптен басталады. Сондықтан бұл белгілерді қазірден әдетке айналдырыңыз. Станцияда тұрған құрамның астынан жүрме, жолды кесіп өтпе. Машинист, кезекші ондай қозғалыстарды көрмей қалады. Сондықтан белгіленген тәртіп сақталу керек. Құрамды айналып өтуге ерінбеңіз. Теміржолдың барлық жері қауіпті аймақ», – деді Ақтөбе локомотив пайдалану депосының бас инженері Бақытқали Жанесов.
Кездесуге Ақтөбе жол дистанциясының еңбекті қорғау жетекшісі де қатысты. Қауіпсіздік тақырыбында баяндама жасап, мысалдар келтірді. Теміржол сақшылары суық қару ұстау, есірткі қолдану сияқты заңға қайшы жат дүниелерден сақ болып, болашақ теміржолшыларға өз ісінің білгірі болуға қазірден дайындалуға, оның негізі білімде жатқанын атап өтті. Сондай-ақ, теміржолшы болудың әлеуметтік және экономикалық тұрғыдан артықшылықтары бар екенін жеткізді.